Žychary hrodzienskaha mikrarajona Foluš niezadavolenyja budaŭnictvam AZS
Budaŭnictva čarhovaj aŭtazapravačnaj stancyi na terytoryi haju ŭ hrodzienskim mikrarajonie Foluš vyklikaje niezadavolenaść u miascovych žycharoŭ. Pad pahrozaj nie tolki ekałahičnaja biaśpieka, ale i histaryčnaja kaštoŭnaść hetaj terytoryi. U hady Druhoj suśvietnaj vajny tut raźmiaščaŭsia łahier dla savieckich vajennapałonnych «Štałah», a ciapier znachodzicca pomnik zahinułym.
«Haj, jaki vysiakajuć, byŭ miescam cichaha adpačynku i ŭkryćciom ad letniaj śpioki dla mam z kalaskami. Kudy im zaraz padacca? — raskazvaje Natalla Białko, žycharka doma, nasuprać jakoha budujuć AZS. — Urbanizacyja pavinna mieć miežy. Dzieci nie na słovy źviartajuć uvahu, a na ŭčynki darosłych. Kolki možna havaryć adno, a rabić inšaje? 9 maja siudy zaŭsiody prychodziać vieterany i školniki, uskładajuć kvietki, hučać uračystyja załpy, a ciapier pa hetym miescy jeździać traktary i budaŭničyja katki».
Pavodle słoŭ Natalli Białko, žychary najbližejšych damoŭ užo nakiroŭvali listy z prośbaj spynić budaŭničyja raboty ŭ Hrodzienski abłvykankam i VA «Biełarusnafta», adnak biezvynikova — raboty aktyŭna praciahvajucca.
U adździele architektury Hrodzienskaha harvykankama BiełaPAN zajavili, što pomnik zahinułym vajennapałonnym čapać nie buduć. Vakoł jaho pakinuć niekalki dreŭ i dastatkova miesca, kab było kudy pakłaści kvietki.
U svaju čarhu, hrodzienskaja krajaznaŭca Taćciana Kozak śćviardžaje: ustanavić dakładnaje miesca raźmiaščeńnia łahiera «Štałah» vielmi składana. «Jon pieršapačatkova budavaŭsia dla źniščeńnia vajennych čyrvonaarmiejcaŭ: tut trymali i zabivali savieckich sałdat. Foluš — mikrarajon, jaki ŭvieś čas raście. Litaralna niadaŭna padčas budaŭničych rabot tut znajšli astanki ludziej, žančyn i dziaciej. Takim čynam, možna vykazać mierkavańnie, što tut zabivali nie tolki vajennasłužačych, ale i mirnaje nasielnictva», — adznačyła krajaznaŭca.
Na dumku Kozak, na hetaj terytoryi treba budavać nie AZS, a «ceły miemaryjalny kompleks».