Fanatam uvalili, a paśla aštrafavali
Incydent zdaryŭsia ŭ niadzielu ŭ Minsku na matčy «Dynama» j «Dniapra». Na matčy było zatrymana siem fanataŭ z Mahilova i dva minčuki.
Fota Goals.by.
Incydent zdaryŭsia ŭ niadzielu 25 vieraśnia ŭ časie sustrečy minskaha «Dynama» i mahiloŭskaha «Dniapra» ŭ Minsku. Kamandy sustrakalisia na stadyjonie «Dynama-Juni», što ŭ Kuncaŭščynie.
U siektary haściej uspychnuła bojka, u spravu ŭmiašaŭsia śpiecnaz. Pad haračuju ruku piaciora milicyjantaŭ dali pytlu adnamu z fanataŭ.
U Frunzienskim RUUS karespandentu «NN» raskazali, što na matčy było zatrymana siem fanataŭ z Mahilova, i dva prychilniki «Dynama». Adnaho niepaŭnaletniaha zaŭziatara pieradali baćkam.«Fanaty pačali bojku pamiž saboj, milicyja vymušanaja była ŭmiašacca», — patłumačyli ŭ RUUS. Na zatrymanych skłali pratakoły pavodle art. 17.1 KaAP (drobnaje chulihanstva). Ich abvinavacili ŭ parušeńni hramadskaha paradku z časie matča. U paniadziełak adbylisia sudy, adzin zatrymany atrymaŭ štraf 140 tysiač rubloŭ. astatnija pa 70 tysiač.
Davać acenku dziejańniam śpiecnaza ŭ RUUS admovilisia, zaznačyŭšy, što nie majuć da hetaha momantu niepasrednaha dačynieńnia.
Zdareńnie vyklikała rezanans u zaŭziatarskim asiarodku.
Adzin ź vidavočcaŭ śćviardžaje, što haściej pačali dražnić haspadary.Nibyta kala fanackaha siektara mahiloŭcaŭ prachodziła hrupa zaŭziataraŭ minskaha kłuba. Spynilisia nasuprać haściavoha siektaru i pačali vykrykvać «Tolki «Dynama!» U sutyčku fanataŭ umiašaŭsia śpiecnaz.
Vidavočca piša, što, kab sucišyć žarści, milicyjanty bili žorstka — «i pa hałavie, i pa nyrkach».
Na forumach paŭtarajecca dumka, što milicyja śviadoma ci nie, ale spravakavała bojku, dapuściŭšy da siektara haściej fanataŭ «Dynama».
Pradstaŭnik «Dniapra» paviedamiŭ «NN», što pakul nie maje nijakaj infarmacyi pra zatrymanych. Jon padkreśliŭ, što kłub kali i budzie ładzić niejkuju pravierku, to tolki paśla źjaŭleńnia aficyjnaj infarmacyi z kampietentnych orhanaŭ. Pres-sakratar mahiloŭskaha kłuba patłumačyŭ taksama, što na futbolnych matčach fanaty kłubaŭ pavinny być izalavanyja, a milicyja musić zabiaśpiečyć achovu haściej. «Prynamsi, na našym stadyjonie «Spartak» tak robicca».
U pres-słužbie «Dynama» pastavili pad sumnieŭ infarmacyju, raźmieščanuju na futbolnych sajtach.Pa słovach pres-sakratara kłuba, u ich niama infarmacyi pra zatrymanych dynamaŭskich fanataŭ, a tamu jany nie zajmajucca hetym pytańniem. Jon nie vyklučyŭ i mahčymaści taho, što kanflikt uźnik pamiž fanatami «Dniapra» i milicyi.
Niadzielny incydent na stadyjonie ŭ Kuncaŭščynie nahadvaje vypadak u Babrujsku, što zdaryŭsia 27 maja hetaha hoda.Tady sustrakalisia miascovaja «Biełšyna» i ŭsio toje ž minskaje «Dynama». Paśla zabitaha hoła dynamaŭcy padbiehli da trybuny svaich fanataŭ, a milicyjanty ŭ hety momant pačali adhaniać fanataŭ ad kraju pola. Adzin sa śpiecnazaŭcaŭ raspyliŭ bałon z hazam, patrapiŭšy pry hetym ŭ piacihadovaha chłopčyka, jaki pryjšoŭ na futbol z baćkam. Unutranaja pravierka nie vyjaviła ŭ dziejańniach praparščyka Uładzimira Recikava parušeńniaŭ i pieravyšeńnia paŭnamoctvaŭ. Adnak jaho kamandzir paprasiŭ u baćkoŭ chłopčyka prabačeńnia.