Šejman palacieŭ u Karakas

27 vieraśnia — 3 kastryčnika biełaruskaja delehacyja na čale z pamočnikam prezidenta pa asablivych daručeńniach Viktaram Šejmanam znachodzicca z rabočym vizitam u Karakasie (Vieniesueła).

Jak paviedamiŭ 29 vieraśnia na bryfinhu pres-sakratar MZS Biełarusi Andrej Savinych, metaj vizitu źjaŭlajecca praviadzieńnie pasiadžeńnia Biełaruska-vieniesuelskaj sumiesnaj kamisii vysokaha ŭzroŭniu.

«U ramkach pracy kamisii płanujecca pasiadžeńnie hrupy pa palityčnych pytańniach, rabočych hrup pa supracoŭnictvie ŭ halinie zdabyčy nafty, naftachimii, hazifikacyi i enierhietyki, u śfiery pramysłovaści, navuki i technałohij, žyllovaha budaŭnictva, hrupy pa supracoŭnictvie ŭ halinie sielskaj haspadarki i charčavańnia, a taksama hrupy pa handlovych pytańniach», — paviedamiŭ pres-sakratar.

Pavodle jaho słoŭ, padčas hetych mierapryjemstvaŭ baki abmiarkujuć pytańni, źviazanyja z zabieśpiačeńniem efiektyŭnaj pracy sumiesnaha pradpryjemstva pa zdabyčy nafty «Pietralera Biełavieniesałana», sumiesnaha pradpryjemstva pa siejsmaraźviedcy «Siśmika Biełavieniesałana», a taksama pačatak pracy sumiesnaha pradpryjemstva pa akazańni pasłuh u naftavaj halinie «Pietraleras Biełavieniesałana».

Dvuchbakovaja kamisija razhledzić taksama pytańni, źviazanyja z realizacyjaj prajektaŭ budaŭnictva ŭ štacie Barynas zavodaŭ pa zborcy traktarnaj, aŭtamabilnaj, darožna-budaŭničaj techniki, arhanizacyjaj servisnaha absłuhoŭvańnia biełaruskaj techniki ŭ Vieniesuele, dziejnaściu sumiesnaha biełaruska-vieniesuelskaha handlovaha pradpryjemstva «Vienbiełkam».

Členy kamisii aznajomiacca taksama z chodam budaŭnictva žylla ŭ štatach Arahua, Barynas, a taksama ahraharadka ŭ štacie Huaryka.

Kamientary da artykuła