Piaskoŭ: Pucin nie znachodziŭ amfaraŭ, ich padkłali archieołahi

Uładzimir Pucin nie znachodziŭ amfaraŭ na dnie Azoŭskaha mora. Ich dla jaho na dnie śpiecyjalna pakinuli archieołahi, «kab zrabić pryjemnaje»,

U žniŭni hetaha hoda padčas naviedvańnia łahiera archieołahaŭ na bierazie Tamanskaha zaliva Uładzimir Pucin pahruziŭsia z akvałanham na dvuchmietrovuju hłybiniu i vyjšaŭ na bierah, trymajučy ŭ rukach dźvie staražytnych pasudziny.

«Naturalna, jany byli znojdzienyja padčas ekśpiedycyi, za niekalki dzion ci tydniaŭ da taho. Naturalna, ich ci pakinuli tam ci pakłali — heta całkam narmalna i zusim nie padstava dla ŭsioj hetaj złaślivaści», — skazaŭ Piaskoŭ.

Pastanovačnaja padzieja adrazu kinułasia ŭ vočy šmatlikim błohieram i žurnalistam, vyklikaŭšy masu naśmiešak i karykatur.

Znajści zbany VI–VIII stahodździaŭ Pucin zdoleŭ nadziva lohka: dźvie amfary bieź śladoŭ praciahłaha znachodžańnia pad vadoj znachodzilisia na bačnym miescy na nievialikaj hłybini i byli vydatna aśvietlenyja.

Piaskoŭ skazaŭ, što heta ideja adnaho z udzielnikaŭ archieałahičnaj ekśpiedycyi. Pavodle słovaŭ pres-sakratara premjera, im zachaciełasia, kab Pucin, nyrnuŭšy, ubačyŭ, «jak heta vyhladaje nasamreč».

Havoračy pra roznyja lehiendy, što atačajuć rasijskaha premjera, Piaskoŭ dadaŭ, što Pucin «naohuł nie maje patreby ni ŭ pres-sakratarach, ni ŭ imidžmejkierach», tamu što bolšuju častku rašeńniaŭ prymaje sam.

Rasijski premjer viadomy svajoj luboŭju da efiektnaha źjaŭleńnia na publicy. Za čas svajho prezidenctva i premjerstva jon vychodziŭ u mory na padvodnaj łodcy, lotaŭ na źniščalnikach, samalocie-amfibiiBie-200, karmiŭ tyhraniataŭ, vadziŭ Ładu «Hranta» i Ładu «Kalinu», jeździŭ za rulom balida Formuły-1, a taksama ahalaŭ tors.

Dziejny prem'jer-ministr źbirajecca bałatavacca ŭ prezidenty Rasii na sakavickich vybarach 2012 hoda i moža apynucca na čale dziaržavy treci raz.

4 kastryčnika jon napisaŭ artykuł u haziecie «Iźviestija», dzie zajaviŭ, što źbirajecca budavać Jeŭrazijski sajuz z Rasii, Biełarusi i Kazachstana.

Dźmitryj Piaskoŭ paćvierdziŭ, što stvareńnie sajuza budzie adnym z pryjarytetaŭ Pucina na praciahu jaho novaha prezidenckaha termina.

Kamientary da artykuła