Lhotnyja kredyty abmiažujuć da minimumu

Norma pastanoŭki na ŭlik u Minsku składzie 10 kv. m, kredytavańnia — 15 kv. m na čałavieka.

U Biełarusi źmieniacca ŭmovy davańnia lhotnych kredytaŭ na žyllo i katehoryi nasielnictva, jakija pretendujuć na ich. Pra heta było abvieščana 14 kastryčnika ŭ Minsku na pres-kanfierencyi z udziełam pradstaŭnikoŭ Ministerstva architektury i budaŭnictva.

Kiraŭnik Minbudarchitektury Anatol Ničkasaŭ zaznačyŭ, što ŭ kastryčniku ministerstva vyniesie na razhlad Alaksandra Łukašenki prajekt źmianieńniaŭ i dapaŭnieńniaŭ va ŭkazy № 185 i 43.

Pavodle jaho słoŭ, da katehoryj, jakija majuć najbolšuju patrebu ŭ palapšeńni žyllovych umoŭ, adnosiacca šmatdzietnyja siemji; siemji, jakija majuć dziaciej-invalidaŭ pieršaj i druhoj hrup; vajennasłužačyja i maładyja śpiecyjalisty. Aprača taho, na lhotnaje kredytavańnie zmohuć raźličvać hramadzianie, jakija majuć invalidnaść, źviazanuju z radyjacyjnymi avaryjami; hramadzianie, jakija žyvuć u žyłych pamiaškańniach, pryznanych nieprydatnymi dla pražyvańnia; hramadzianie, jakija žyvuć ź siemjami ŭ internatach bolš jak 10 hadoŭ, a taksama niekatoryja inšyja katehoryi nasielnictva.

Načalnik upraŭleńnia žyllovaha budaŭnictva Minbudarchitektury Alaksandr Horval zaznačyŭ, što razam sa źmienaj katehoryj hramadzian, jakija majuć patrebu ŭ palapšeńni žyllovych umoŭ, źmieniacca i ŭmovy davańnia dziaržaŭnaj padtrymki,

naprykład kredyt składzie nie poŭny košt kvatery, a 90%.

Prajekt papravak u zhadanyja ŭkazy, pavodle jaho słoŭ, praduhledžvaje, što pry vydzialeńni lhotnaha kredytu prapanoŭvajecca ŭličvać nie tolki žyllo, jakoje jość «va ŭłasnaści ŭ členaŭ siamji ŭ hetym nasielenym punkcie, dzie čałaviek znachodzicca na ŭliku», ale i va ŭsioj krainie ŭ cełym.

Horval nahadaŭ, što ŭ Biełarusi sanitarnaja norma zabieśpiačeńnia žyllom ustanoŭlena ŭ miežach 15 kv. m. «Heta norma pieranosicca i na kredytavańnie, takim čynam, budzie nie 20 kv. m na čałavieka, a 15», — zaznačyŭ načalnik upraŭleńnia budaŭnictva, dadaŭšy, što heta źviazana z daručeńniem Łukašenki abmiežavać prytok nasielnictva ŭ Minsk.

Norma pastanoŭki na ŭlik u Minsku składzie 10 kv. m, kredytavańnia — 15 kv. m na čałavieka.

Zachoŭvajucca peŭnyja lhoty na kredytavańnie žylla ŭ nasielenych punktach z nasielnictvam da 20 tys. žycharoŭ — u hetym vypadku kredytavańnie składzie 10% ad staŭki refinansavańnia; u nasielenych punktach, dzie pražyvajuć bolš za 20 tys. čałaviek, — 20% ad staŭki refinansavańnia. Dla šmatdzietnych siemjaŭ zachavajecca adnapracentny kredyt na 40 hadoŭ.

«Pavodle našych raźlikaŭ, u haradach da 20 tys. žycharoŭ prykładna 140 tys. čarhavikoŭ. Usiaho pad novyja ŭmovy, što prapanoŭvajucca pa ŭkazie № 185, traplajuć prykładna 260 tys. čarhavikoŭ z ahulnaj kolkaści, što znachodziacca ŭ čarzie», — paviedamiŭ Horval.

Kamientary da artykuła