Novy Hod biez aliŭje
Piać varyjantaŭ, jak sustreć Novy hod nie doma.
Uletku dumaj pra zimu, kaža biełaruskaja prykazka. Navahodnija ž pryhody varta płanavać chacia b vosieńniu. «Naša Niva» prapanuje varyjanty zapaminalnaha adpačynku ŭ našaj krainie i za miažoj.
Ahrasiadziba
Adpačyvać u Biełarusi vyhadna — nie nadta bje pa kašalku i nie davodzicca marnavać čas na darohu. Vakoł Minska znachodziacca dziasiatki ahrasiadzibaŭ i katedžaŭ, jakija šukajuć pastajalcaŭ na Novy hod. Ceńnik u paraŭnańni sa zvyčajnymi dniami pavialičvajecca ŭdvaja i dasiahaje $30—50 z čałavieka. Za śviatočny stoł i ranišniaje padmacavańnie daviadziecca dapłacić $15—20. Ź vialikaj kampanijaj možna śmieła patrabavać źnižku.
U siadzibach redka źmiaščajucca bolš za 20 čałaviek, tamu nieznajomcaŭ być nie pavinna. Ideja pakatacca na łyžach i sankach, dobra pahulać, a na nastupny dzień viarnucca damoŭ padabajecca ŭsim. Taki vid śviatkavańnia varta zamaŭlać zahadzia, ale možna pačakać i da pačatku śniežnia.
Sanatoryj ci restaran
Kłasičnaje śviata, tolki hatavać samomu ničoha nie treba. Tradycyjnaje bankietnaje mieniu, vinšavańnie ad kiraŭnika dziaržavy na vialikim ekranie i pjanyja tancy ź nieznajomymi ludźmi, jakim paščaściła apynucca ŭ restaranie razam z vami.
Sanatoryi imknucca zaciahnuć klijentaŭ na adpačynak nie na dzień-dva, a chacia b na tydzień. Taki tur moža kaštavać kala $250, i svabodnyja miescy ŭ prafsajuznych sanatoryjach jašče zastalisia. Za dźvie ž načoŭki (z 31 śniežnia da 2 studzienia) daviadziecca vykłaści $100.
Śniežnaje zamiežža
Dalar źjaviŭsia ŭ svabodnym prodažy, tamu płanavać zamiežnyja padarožžy stała praściej. Navahodnija śviaty ŭ Biełarusi ŭ apošnija hady ŭsio čaściej byvajuć bieź śniehu, tamu adzin z pryvabnych varyjantaŭ, kab viarnucca ŭ śniežnaje dziacinstva — Karpaty. Možna jechać i ŭ Zakarpaćcie, a možna abmiežavacca Lvoŭščynaj.
Kali zdymać siadzibu ci katedž całkam, možna ŭkłaścisia ŭ $250—300. Za viačeru daviadziecca dapłacić z raźlikam $10—20 z čałavieka.
Tyja, chto majuć adkrytuju šenhienskuju vizu, bolš hrošaj na adpačynak i vysokija patrabavańni da harnałyžnych kurortaŭ, mohuć prajechać krychu dalej, u Polšču ci Słavakiju.
Staličny tur
«Tury na vychodnyja» pa susiednich krainach karystajucca popytam zaŭsiody. Na Novy hod — udvaja, praŭda, i cana istotna ŭzrastaje. Naprykład, dva dni ŭ vyšejzhadanym Lvovie kaštujuć $250 (z bankietam) zamiest zvyčajnych $100. Stolki ž kaštuje i navahodni tur u Vilniu.
Jehipiet/Turcyja
Sustreć Novy hod možna i ležačy na plažy i nie słuchajučy niaspynny manałoh z televizara. U Jehipcie, Turcyi, Indyi i inšych kurortnych krainach pryvykli, što jeŭrapiejcy pieradusim śviatkujuć Kalady, ale arhanizujuć uračystuju viačeru i ŭ biełaruski Novy hod.
Košt adpačynku nie mocna adroźnivajecca ad zvyčajnaha, kali nie patrapić na «darahoje» 25 śniežnia. Dapłacić daviadziecca chiba što za samu viačeru — kala $50.
U cełym tydniovy adpačynak u biudžetnym hateli moža abyścisia siamji z dvuch čałaviek u $1400—1600.