Budučyja premjery i Hrecyi, i Italii — vypuskniki amierykanskich univiersitetaŭ
U toj ža čas abodva jany prajšli praz pracu ŭ jeŭrastrukturach.
Biespartyjny technakrat Marya Monci ŭznačalić novy ŭrad Italii. Były namieśnik kiraŭnika Jeŭrapiejskaha centralnaha banka Łukas Papademas stanie novym kiraŭnikom Hrecyi.
Novyja ŭrady na čale ź biespartyjnymi buduć svabadniejšymi ŭ svaich dziejańniach: im nie tre budzie zmahacca za hałasy vybarcaŭ. Tak im budzie lahčej ažyćciavić naśpiełyja niepapularnyja miery. Dźvie paŭdniovajeŭrapiejskija krainy doŭhi čas žyli nie pa srodkach i ŭleźli ŭ vialikija daŭhi.Aščadnym paŭnočnajeŭrapiejcam — niemcam, niderłandcam, finam — nadakučyła finansavać paŭdniovych sajuźnikaŭ.
U karjerach Monci i Papademasa šmat što supadaje. Pieršy skončyŭ u ZŠA mahistraturu (Jielski ŭniviersitet), druhi — Masačusetski technałahičny instytut. Akramia taho, abodva prajšli praz škołu jeŭrapiejskich instytutaŭ. Monci dvojčy razy zajmaŭ pasadu jeŭrakamisara (ministra ES). Pieršy raz jon byŭ kamisaram pa pytańniach unutranych rynkaŭ i finansavych pasłuh, druhi raz — pa pytańniach kankurencyi. U Bruseli jon prasłaviŭsia jak ćviordy zmahar z manapalizmam. Siarod inšaha, pry im Jeŭrakamisija aštrafavała na paŭmiljarda dalaraŭ «Majkrasoft» za «Vindoŭz», zrobleny tak, što kankurujučym kampanijam ciažka spałučać ź im svajo prahramnaje zabieśpiačeńnie. Pasadu kamisara jon straciŭ, bo, miakka kažučy, nie sychodziŭsia ŭ pohladach ź Silvia Bierłuskoni, a imiony jeŭrakamisaraŭ nazyvajuć ža asobnyja krainy.
Papademas — prafiesijny bankir. I pracavaŭ jon niejki čas u jeŭrapiejskim Centrabanku.
Jak bačym, abodva novyja dziaržaŭnyja dziejačy atrymali vydatnuju adukacyju (amierykanskija ŭniviersitety i tady byli, i ciapier zastajucca najlepšymi ŭ śviecie), vydatna vałodajuć zamiežnymi movami, i razumiejuć, jak funkcyjanuje miechanizm Jeŭrapiejskaha Sajuza. Ale svaju asnoŭnuju karjeru jany zrabili ŭ siabie na radzimie, va ŭniviersitetach, kampanijach i bankach.