Uziaty ŭ pałon syn Kadafi
Jaho zatrymali pry sprobie pierasiekčy miažu ź Nihieram.
U Livii na miažy ź Nihieram pry nieviadomych abstavinach zatrymany syn Muamara Kadafi Siejf al-Isłam. Paśla śmierci baćki jon chavaŭsia i abiacaŭ zmahacca za svaju krainu da kanca. Pradstaŭniki novaj livijskaj ułady abiacajuć, što
praces nad im budzie prachodzić u adpaviednaści ź mižnarodnymi patrabavańniami i ŭ kantakcie z Haahskim mižnarodnym sudom, jaki vinavacić Siejfa al-Isłama ŭ złačynstvach suprać čałaviectva.
* * *
Pa infarmacyi pradstaŭnikoŭ Nacyjanalnaj pierachodnaj rady Livii, Siejf al-Isłam z dvuma achoŭnikami sprabavaŭ pierajści miažu, kab biehčy ŭ Nihier. Jon znachodzicca ŭ dobrym zdaroŭi i budzie dastaŭleny ŭ horad Zintan.
U červieni 2011 hoda Haahski mižnarodny kryminalny sud vydaŭ ordar na aryšt Muamara Kadafi, Siejfa al-Isłama i načalnika livijskaj vyviedki Abduły al-Sanusi.
Siejf al-Isłam – druhi syn Kadafi i pieršy syn ad jaho druhoj žonki, jon naradziŭsia ŭ 1972 hodu ŭ Trypali. Z rańniaha junactva jon zajmaŭsia palitykaj i nieadnarazova pradstaŭlaŭ Kadafi na mižnarodnych pieramovach. Skončyŭ livijski ŭniviersitet «Al-Fatech» pa śpiecyjalnaści «architektar i inžynier».
U 1997 hodu stvaryŭ Mižnarodny fond supracoŭnictva ŭ halinie dabračynnaści Kadafi, a taksama ŭznačaliŭ Livijskaje nacyjanalnaje tavarystva pa kantroli nad narkotykami. Napačatku nulavych vučyŭsia ŭ biznes-škole ŭ Aŭstryi, a paźniej – u Łondanskaj škole ekanomiki. Publična vystupaŭ za stabilizacyju adnosin Livii i Zachadu, dla čaho i zasnavaŭ Dabračynny fond Kadafi, jaki zajmaŭsia vypłatami kampiensacyj svajakam achviar teraktaŭ, arhanizavanych livijcami. Fond byŭ zarehistravany ŭ Šviejcaryi.
U 2005 hodu Siejf al-Isłam vystupiŭ z zaklikam apublikavać infarmacyju pra parušeńni praŭ čałavieka ŭ Livii i vyzvalić niekatorych palityčnych źniavolenych. Vystupaŭ z asobnymi krytyčnymi zajavami ŭ adras palityki baćki, u svaich publikacyjach zaklikaŭ pryniać u Livii kanstytucyju i dałučycca da Dekłaracyi praŭ čałavieka.
U žniŭni 2008 hoda zajaviŭ pra namier syści z palityki, a ŭ 2009 hodu stvaryŭ Arabski aljans za demakratyju, raźvićcio i pravy čałavieka.
Paśla taho, jak u lutym 2011 hady ŭ Livii pačałosia paŭstańnie suprać Kadafi, Siejf al-Isłam nieadnarazova pradstaŭlaŭ svajho baćku pierad presaj, nazyvaŭ paŭstancaŭ «terarystami» i kazaŭ pra nieabchodnaść ćviordych mier.
Praź niekalki miesiacaŭ paśla ŭviadzienia Savietam biaśpieki AAN sankcyj suprać Kadafi i jaho asiarodździa Siejf al-Isłam byŭ abvieščany ŭ mižnarodny vyšuk, a paśla śmierci baćki ŭ kastryčniku 2011 hoda chavaŭsia na terytoryi Livii. Jon zajaviŭ, što nie źbirajecca pakidać Liviju i budzie zmahacca dalej za svaju krainu. Ale praź niekatory čas livijskija ŭłady abviaścili, što jon hatovy zdacca sudu.
U kancy kastryčnika hałoŭny prakuror Mižnarodnaha kryminalnaha suda Łuis Marena-Akampa paćvierdziŭ, što ź Siejfam al-Isłamam viaducca pieramovy na niefarmalnym uzroŭni praz pasrodnikaŭ. Marena-Akampa paviedamiŭ, što syn Kadafi hatovy zdacca, kali jamu harantujuć spraviadlivy sudovy razhlad, adnak da ciapierašniaha nijakich paviedamleńniaŭ pra Siejf al-Isłama nie pastupała.