U Breście da 19 hadoŭ pazbaŭleńnia voli pryhavorany bomž, jaki zabiŭ mužčynu

Sudovaja kalehija pa kryminalnych spravach Bresckaha abłasnoha suda 21 listapada vyniesła pryhavor 36-hadovamu bamžu. Jon pryznany vinavatym va ŭčynieńni zabojstva z asablivaj žorstkaściu (p. 6 č. 2 art. 139 KK) i kradziažy (č. 2 art. 205 KK).

Jak paviedamiŭ śledčy prakuratury Bresckaj vobłaści Raman Dziamčuk, jaki rasśledavaŭ hetuju spravu, złačynstva było ŭčyniena 1 krasavika ŭ Breście ŭ pryvatnym žyłym domie. 55-hadovy mužčyna, jaki tam žyŭ, dazvoliŭ pažyć ź im bamžu, pakul toj nie znojdzie pracu i nie vyznačycca ź miescam žycharstva.

1 krasavika pamiž imi ŭźnikła svarka, padčas jakoj pastajalec nanios haspadaru doma niekalki ŭdaraŭ mietaličnym łomam u vobłaść hałavy i šyi, pryčyniŭ mužčynu ciažkija cialesnyja paškodžańni. Zatym jašče žyvym zakapaŭ jaho ŭ dvary doma i ŭciok, vykraŭšy kampjutar i mabilny telefon paciarpiełaha.

Sudova-miedycynskaja ekśpiertyza ŭstanaviła, što śmierć nastupiła ŭ vyniku aśfiksii — mužčyna zadychnuŭsia pad ziamloj. Jaho cieła było znojdziena 11 krasavika supracoŭnikami milicyi.

Pa padazreńni va ŭčynieńni zabojstva bomž byŭ zatrymany 13 krasavika ŭ Minsku. Da hetaha času jon paśpieŭ zbyć ukradzieny kampjutar. Telefon byŭ u jaho kanfiskavany.

Sudovaja kalehija Bresckaha abłasnoha suda pryhavaryła abvinavačanaha da 19 hadoŭ pazbaŭleńnia voli z adbyvańniem pakarańnia ŭ papraŭčaj kałonii strohaha režymu.

Pryhavor nie nabyŭ zakonnuju moc i moža być abskardžany. U momant učynieńnia zabojstva bomž znachodziŭsia ŭ stanie ałkaholnaha apjanieńnia. U sudzie pryznaŭ svaju vinu častkova. Raniej piać razoŭ jon byŭ sudzimy za kradziež majomaści.

Kamientary da artykuła