Pravaabaroncy nie raźličvajuć na apraŭdalny prysud Bialackamu

Nahadajem, siońnia na pasiadžeńni suda Pieršamajskaha rajona Minska prakuror Uładzimir Sajkoŭski paprasiŭ pryhavaryć Bialackaha da piaci hadoŭ pazbaŭleńnia voli ŭ kałonii ŭzmocnienaha režymu z kanfiskacyjaj majomaści. Abarona, u svaju čarhu, prosić sud apraŭdać Bialackaha.

Jak ličyć juryst Juryj Čavusaŭ, pryhavor budzie, chutčej za ŭsio, abvinavaŭčy i źviazany z pazbaŭleńniem voli, bo biełaruski sud «nie źjaŭlajecca niezaležnaj halinoj ułady». «Mahčyma, jamu skasujuć adzin hod z zapytanych prakuroram piaci hadoŭ — heta maksimum, na što ja raźličvaju, — skazaŭ Čavusaŭ. — Chacia, biezumoŭna, pazicyja abarony była bolš abhruntavanaj, i tyja arhumienty, jakija ŭ sprečkach vykłaŭ advakat, staviać pad sumnieńnie vinavataść Bialackaha ŭ pryncypie».

Na jaho dumku, niehatyŭnyja nastupstvy taho, što Bialacki apyniecca ŭ miescach pazbaŭleńnia voli, «buduć paraŭnalnyja z tymi, ź jakimi ŭłady sutyknulisia pry źniavoleńni pad vartu kandydataŭ u prezidenty na vybarach 2010 hoda».

Pravaabaronca Valancin Stefanovič taksama ličyć, što Bialackamu vyniesuć abvinaŭčy pryhavor. «Chutčej za ŭsio, pryhavor budzie źviazany z pazbaŭleńniem voli z kanfiskacyjaj majomaści.

Ułady nie ŭpuściać šans pasprabavać adabrać majomaść,

Pry hetym jon padkreśliŭ: «My svaju dziejnaść spyniać nie źbirajemsia, budziem jaje praciahvać, niahledziačy na surjoznyja prablemy, jakija nam buduć stvoranyja».

Dyrektar pravaabarončaj infarmacyjna-aśvietnaj ustanovy «Płatforma» Andrej Bandarenka, u svaju čarhu, zajaviŭ: «Vielmi nie chaciełasia b, kab sud pajšoŭ urazrez z pałažeńniami dziejnaha zakanadaŭstva». «U vystupleńni advakata było dakładna ŭkazana na toje, što sabranyja „dokazy“ byli zdabytyja niezakonnym čynam, što abvinavačańnie nie paddajecca nijakaj normie ni zakona, ni zdarovaha sensu, ni łohicy», — skazaŭ Bandarenka.

«Dakumienty, jakija pradastaviła dla abvinavačańnia prakuratura, ja mahu nabrać na kampjutary za 15 chvilin, — pradoŭžyŭ jon. — Jak možna padavać sudu dakumienty, na jakich niama ni piačatki, ni podpisaŭ słužbovych asob? Jak možna padavać dakumienty, jakija iduć urazrez ź mižnarodnymi damoŭlenaściami? Jak možna abvinavačvać čałavieka, kali nie padadzieny sam łancužok prachodžańnia srodkaŭ: ad kaho pastupali, na jakich umovach, jak raschodavalisia, kamu pradastaŭlalisia? Ułasna kažučy, samo abvinavačańnie nie vartaje vyjedzienaha jajka, i niezrazumieła, za što prakuror i śledstva atrymlivajuć hrošy», — havoryć Bandarenka.

«U mianie zastajecca nadzieja na toje, što zaŭtra my paciśniem Bialackamu ruku i zmožam jaho abniać», — zaklučyŭ pravaabaronca.

Kamientary da artykuła