Polšča prypyniaje ŭdzieł u budaŭnictvie litoŭskaj AES

Polšča vyrašyła spynić svoj udzieł u prajekcie Visahinskaj atamnaj elektrastancyi, inicyjataram jakoha vystupiła Litva, pra heta 9 śniežnia paviedamiła enierhietyčnaja kampanija PGE.

«Z ulikam umovaŭ, jakija padalisia nam nieprymalnymi, z ulikam inšych važnych dla našaj hrupy prajektaŭ, my vyrašyli zamarozić svoj udzieł u hetaj prahramie pierad tym jak pryniać farmalnyja abaviazacielstvy», — skazaŭ ŚMI kiraŭnik PGE Tomaš Zadroha.

U paviedamleńni PGE skazana, što kampanija spyniła i pieramovy z rasijskaj enierhietyčnaj hrupaj Inter Rao ab mahčymaści kuplać elektraenierhiju ŭ Kalininhradskaj vobłaści.

Ciapier Polšča vyrašyła sama budavać AES, jakaja pavinna źjavicca da 2020 hoda. Vyznačanyja try patencyjnyja miescy — Žarnoviec (Zarnowiec), Chočava (Choczewo) i Haski (Gaski). Na siońnia ŭ Polščy niama nivodnaj AES.

38-miljonnaja Polšča raniej pakładałasia na zapasy kamiennaha vuhalu, ciepłaelektrastancyi vyrablajuć 94% elektraenierhii.

Litva razam z Łatvijaj, Estonijaj i Polščy mieła namier pabudavać AES da 2020 hoda. Mahčymym stratehičnym inviestaram vybrali japonska-amierykanski kancern Hitachi GE Nuclear Energy. Adnak paśla vychadu Polščy z prajekta niajasna, ci zdužaje Bałtyja sama vyciahnuć takuju inviestycyju i ci dosyć enierhietyčnaha rynku troch hetych krain dla AES. Pieršaj svaju AES uviadzie ŭ dziejańnie Rasija. Stancyja budzie znachodzicca pad Kalininhradam. Druhoj spadziajucca zbudavać Astravieckuju AES biełarusy — adnak temp pracaŭ budzie zaležać ad toj sama Rasii, jakaja daje i svaju technałohiju, i finansy.

Kamientary da artykuła