Kazachski ministr: biełaruskich amapaŭcaŭ u Žanaezenie niama
Kazachskaje sieciva kipić ad infarmacyi pra biełaruski desant u Kazachstan.
U horadzie Žanaezen na zachadzie Kazachstanu rychtujucca da pachavańnia adnaho z zahinułych u chvalavańniach. 16 śniežnia, kali palicyja adkryła ahoń pa ŭdzielnikach strajku naftavikoŭ, zahinuli 14 čałaviek i 86 čałaviek byli paranienyja.
Hrupu zachodnich i kazachstanskich žurnalistaŭ, jakija prybyli na stancyju Šetpe, dzie adbylisia sutyknieńni z palicyjaj, pradstaŭniki ŭładaŭ ŭviečary 18 śniežnia sami pavieźli ŭ horad Žanaezen..
Plan «Honh»
U niadzielu ŭviečary, 18 śniežnia, u budynku ŭpraŭleńnia ŭnutranych spraŭ horadu Žanaezen Manhystaŭskaj vobłaści ministar unutranych spravaŭ hienerał Kałmuchanbiet Kasymaŭ daŭ interviju žurnalistam..
Na pytańnie ab tym, chto persanalna daŭ kamandu stralać na paražeńnie, ministar zajaviŭ, što takoj kamandy nichto nie davaŭ. Pavodle jaho, palicyjanty na płoščy ŭ Žanaezenie apynulisia ŭ takoj krytyčnaj sytuacyi, što ŭ ich nie było inšaha vybaru. Jak kaža Kałmuchanbiet Kasymaŭ, kali pačalisia biesparadki, palicyjanty byli biaz zbroi. Zatym, pavodle jaho słoŭ, niekalki palicyjantaŭ viarnulisia ŭ UUS i ŭzbroilisia aŭtamatami Kałašnikava z bajavymi patronami.
Na pytańnie žurnalistaŭ ab tym, chto daŭ hetym palicyjantam dazvoł na atrymańnie aŭtamataŭ i bajavych patronaŭ da ich, kiraŭnik MUS skazaŭ, što nichto nie davaŭ takoha dazvołu, što jany sami atrymali aŭtamaty, bo byŭ uviedzieny ŭ dziejańnie plan «Honh»:
— Aŭtamat Kałašnikava i pistalet Makarava źjaŭlajucca tabelnaj zbrojaj palicyjanta. Tamu, kali ŭvodzicca ŭ dziejańnie plan «Honh», nichto ŭžo nie pytaje, usio prychodziać i atrymlivajuć svaju tabelnuju zbroju.
Jak kaža hienerał Kałmuchanbiet Kasymaŭ, plan «Honh» byŭ uviedzieny načalnikam ŭpraŭleńnia ŭnutranych spraŭ horadu Žanaezen.
Pavodle ministra, palicyjanty stralali z aŭtamataŭ u pavietra, a taksama ŭ ziamlu:
— U asnoŭnym stralali dla zastrašeńnia: uvierch-uniz, uvierch-uniz.
U jakaści dokazu kiraŭnik MUS pryvioŭ prykład z žančynaj, jakaja zahinuła ŭ dzień biesparadkaŭ u Žanaezenie:
— U zahinułaj žančyny kulu znajšli ŭ hałavie. Zrazumieła, kali stralajuć z aŭtamata z takoj adlehłaści, kula ŭ hałavie nie zastajecca. My ličym, što jana trapiła rykašetam i zastałasia ŭ hałavie.
Kałmuchanbiet Kasymaŭ abvierh čutki ab tym, što ŭ Manhystauskuju vobłaść nakiravany atrady amapaŭcaŭ ź Biełarusi. Hetaja čutka była źviazanaja ź inšaj čutkaj — ab tym, što niekatoryja kazachskija amapaŭcy nibyta pierajšli na bok strajkoŭcaŭ abo admaŭlalisia stralać u ich.
Ministar taksama abvierh čutku pra toje, što kitajskija kiraŭniki kampanii «Karažanbasmunaj» nibyta vyvieźli kitajskich rabotnikaŭ i ich siamiejnikaŭ u biaśpiečnaje miesca.
Miortvyja nie havorać
Ministar unutranych spraŭ Kałmuchanbiet Kasymaŭ dazvoliŭ žurnalistam naviedać morh horadu Žanaezen i centralnuju haradzkuju balnicu, dzie prachodziać lačeńnie ludzi, jakija atrymali ahniastrelnaje ranieńnie padčas biesparadkaŭ 16 śniežnia.
Praŭda, kali z boku žurnalistaŭ prahučała prośba ab naviedańni hetych abjektaŭ, jon spačatku zadumaŭsia, a potym rasparadziŭsia, kab u balnicy interviju žurnalistam daŭ hałoŭny lekar. Što da naviedańnia morhu, to jon dazvoł daŭ achvotna, zaŭvažyŭšy pry hetym, što miortvyja nie razmaŭlajuć.
Žurnalisty ŭ morhu rabili fatahrafii. U balnicy im udałosia nia tolki ŭziać interviju ŭ lekaraŭ, ale i pahutaryć ź niekatorymi chvorymi, jakija atrymali ahniastrelnaje ranieńnie. Pakazalna, što adzin z chvorych prademanstravaŭ na hrudziach ranu ad skraznoha ranieńnia aŭtamatnaj kulaj.