Uzłamali taksama paštovyja skryni Chalip, Kalady i siastry Sańnikava

29.12.2011 / 23:01

Radzina: Padobna, staić zadača źniščyć charter97.org.

Śledam za ŭzłomam sajta charter97.org pačałasia DdoS-ataka na jaho, paviedamiła redaktar resursu Natalla Radzina.

«Padobna, staić zadača źniščyć sajt. Dumaju, što moža dajści i da fizičnaj raspravy», — vykazała hipotezu žurnalistka. Pavodle jaje słoŭ, stała viadoma pra sprobu ŭzłomu paštovych skryniaŭ Iryny Bahdanavaj (siastra źniavolenaha kandydata ŭ prezidenty na vybarach-2010 Andreja Sańnikava), Iryny Chalip (žonka Sańnikava) i Natalli Kalady (dyrektar Svabodnaha teatra).

Raniej Radzina paviedamiła, što nieviadomyja złamyśniki vykrali ŭsie paroli i pačali źniščać materyjały, raźmieščanyja na hetym apazicyjnym resursie. Na sajcie byŭ raźmieščany pravakacyjny materyjał, da jakoha redakcyja nie maje nijakaha dačynieńnia. U im utrymlivalisia abraźlivyja vykazvańni na adras Iryny Chalip.

Radzina pierakananaja, što heta sprava ruk biełaruskich śpiecsłužbaŭ.

Redaktar internet-resursu nahadała, što sajt nieadnarazova zaznavaŭ DDoS-ataki i błakavańnie, adnak ciapierašniaja situacyja, pavodle jaje słoŭ, biesprecedentnaja. «Treba nahadać, što heta kryminalnaje złačynstva, i tyja, chto heta robić, buduć pakaranyja», — skazała žurnalistka.

Jana vykazała nadzieju, što ŭdasca ŭ samyja karotkija terminy adnavić pracu sajta i źniščany archiŭ.

Redakcyja «Chartyi'97» raźmiaščajecca ŭ Vilni. Natalla Radzina atrymała ŭ Litvie palityčnaje prystanišča.

Čytajcie taksama:

Kamientary da artykuła