Domračava i Sialimaŭ — lepšyja spartsmieny Biełarusi-2011 hoda pa vynikach apytańnia BiełaPAN

25-hadovaja bijatłanistka Darja Domračava i 28-hadovy barec hreka-rymskaha stylu Alim Sialimaŭ pryznanyja lepšymi spartsmienami Biełarusi 2011 hoda pa vynikach apytańnia BiełaPAN.

U 12-m štohadovym apytańni ŭdzielničali 100 žurnalistaŭ, jakija aśviatlajuć sport, z 45 srodkaŭ masavaj infarmacyi, arhanizacyj i ŭstanoŭ.

Kožnamu ź ich prapanoŭvałasia nazvać trojku lepšych spartsmienak i trojku lepšych spartsmienaŭ; za 1-je miesca naličvałasia try ački, za 2-je — dva, za 3-je — adno.

Domračava nabrała 175 ačkoŭ, atrymaŭšy 33 pieršych, 28 druhich i 20 trecich miescaŭ. Na rachunku Sialimava 130 ačkoŭ (29, 18, 7).

U 2011 hodzie na etapach Kubka śvietu (uklučajučy čempijanat śvietu) Domračava, jakaja była taksama pieramožcaj letašniaha apytańnia BiełaPAN, 11 razoŭ zajmała pryzavyja miescy (siem — u siezonie-10/11 (studzień-sakavik), čatyry — u siezonie-11/12) — try pieršyja, try druhija i piać trecich. Na ČS u Chanty-Mansijsku jana była druhoj u mas-starcie, a ciapier na druhim miescy ŭ ahulnym zaliku KS.

Sialimaŭ staŭ čempijonam śvietu ŭ vahavaj katehoryi da 84 kh. Heta jaho druhi załaty miedal (pieršy zavajavany ŭ 2005 hodzie).

***

Varta adznačyć, što ŭpieršyniu za čas praviadzieńnia apytańniaŭ BiełaPAN zafiksavana razychodžańnie z vynikami štohadovaha apytańnia, jakoje pravodziać Nacyjanalny alimpijski kamitet i hazieta «Sportivnaja panorama». U žančyn tam lepšaj stała čempijonka śvietu pa płavańni na dystancyi 100 mietraŭ volnym stylem Alaksandra Hierasimienia. Pa ŭsioj bačnaści, heta źviazana z tym, što apytańnie NAKa i «SP» pravodziłasia ŭ pieršaj pałovie śniežnia, tady jak apytańnie BiełaPAN — u druhoj, paśla zaviaršeńnia paśpiachovaha dla Domračavaj treciaha etapu Kubka śvietu.

Hierasimienia, jakoj 31 śniežnia spoŭniłasia 26 hadoŭ, zaniała druhoje miesca ŭ žančyn pa vynikach apytańnia BiełaPAN — 161 ačko (32, 24, 17). Na trecim radku — 30-hadovaja čempijonka śvietu i Jeŭropy pa ciažkaj atletycy (da 58 kh) Anastasija Novikava — 107 (17, 20, 16).

U mužčyn druhim staŭ 35-hadovy bronzavy pryzior čempijanatu śvietu pa lohkaj atletycy ŭ šturchańni jadra Andrej Michnievič — 54 ački (10, 7, 10), trecim — 29-hiedovy čempijon śvietu, siarebrany pryzior čempijanatu Jeŭropy pa volnaj baraćbie (120 kh) Alaksiej Šamaraŭ — 52 ački (9, 9, 7).

Kamientary da artykuła