Pjany 19-hadovy na BMW spravakavaŭ maštabnuju pahoniu sa strełami ŭ Minsku

U jaho kryvi było vyjaŭlena 1,12 pramile ałkaholu.

8 studzienia ŭ 2.20 rabotniki AZS pa vulicy Traścianieckaj paviedamili ŭ milicyju ab pjanym kiroŭcy, jaki zapraviŭsia i źjechaŭ u bok praśpiekta Rakasoŭskaha na aŭtamabili BMW 525 sierabrystaha koleru. Narady DAI abśledavali ŭkazany rajon i pabačyli aŭtamabil, jaki na vialikaj chutkaści niośsia ŭ bok skryžavańnia Partyzanskaha

praśpiekta i vulicy Kašavoha.

Inśpiektary DAI zapatrabavali spynicca, ale kiroŭca nijak nie adreahavaŭ. Pačałasia pahonia.

U niejki momant lichač nabliziŭsia da taksi, što ruchałasia ŭ spadarožnym kirunku. Kiroŭca taksi, zaŭvažyŭšy pahoniu i probliskavyja majački mašyny DPS, u adpaviednaści z praviłami adjechaŭ da ŭzbočyny i spyniŭsia. Za im spyniŭsia i BMW, ale kiroŭca pakidać aŭtamabil nie pažadaŭ, a vyrašyŭ kamunikavać praz adčynienyja dźviery. Adnak hutarka praciahnułasia niadoŭha.

U adkaz na patrabavańni vyjści z mašyny, kiroŭca uklučyŭ zadniuju chutkaść i rvanuŭ ź miesca. Pry hetym ledź nie paciarpieŭ inśpiektar DAI.

Zatym pravaachoŭniki byli vymušanyja ŭžyć tabielnuju zbroju. Dva papieradžalnyja streły ŭ pavietra nie padziejničali, i inśpiektary prastrelili ŭciekaču zadnija koły. Ale i paśla hetaha honka, da jakoj padklučylisia dadatkovyja ekipažy DAI, praciahnułasia.

Užo na dyskach BMW ulacieŭ u dvor žyłoha doma, dzie kiroŭca-lichač pakinuŭ mašynu i kinuŭsia naŭcioki. Adnak nohi padviali.

«BMV» advieźli na štrafstajanku, a kiroŭcu — na miedycynski ahlad. Praź dźvie hadziny paśla zatrymańnia ŭ jaho kryvi było vyjaŭlena 1,12 pramile ałkaholu.

Lichačom apynuŭsia chłopiec 1992 hoda naradžeńnia, jaki atrymaŭ paśviedčańnie krychu bolš za hod tamu.

Małady čałaviek paniasie adkaznaść nie tolki za pieravyšeńnie chutkaści i kiravańnie aŭtamabilem u niećviarozym vyhladzie, ale i za supraciŭ supracoŭnikam milicyi pry zatrymańni, a taksama niepadparadkavańnie patrabavańniam inśpiektaraŭ DAI.

Kamientary da artykuła