Aŭtuchoviča płanujuć pieravieści na turemny režym utrymańnia
Vaŭkavyskaha pradprymalnika Mikałaja Aŭtuchoviča, jaki znachodzicca ŭ kałonii, płanujuć pieravieści na turemny režym utrymańnia, paviedamiŭ były advakat Aŭtuchoviča Pavieł Sapiełka.
Pavodle jaho słoŭ, na 17 studzienia ŭ papraŭčaj kałonii № 5 u Ivacevičach, dzie znachodzicca Aŭtuchovič, pryznačana sudovaje pasiadžeńnie pa źmianieńni jaho režymu ŭtrymańnia na turemny.
Jak skazaŭ Sapiełka, 4 studzienia Aŭtuchoviča niečakana vyklikali ŭ administracyju kałonii i pastavili pierad faktam razhladu pytańnia pra źmianieńnie režymu ŭtrymańnia. Adnak jon byŭ suprać słuchańniaŭ biez prysutnaści advakata, tamu sudovaje pasiadžeńnie było pryznačanaje na 17 studzienia.
Sapiełka adznačyŭ, što
13 śniežnia Mikałaj Aŭtuchovič byŭ pieraviedzieny ŭ pamiaškańnie kamiernaha typu terminam na miesiac.«Tolki adnaho ŭčynieńnia dyscyplinarnaj pravinnaści paśla źmiaščeńnia ŭ PKT dastatkova, kab źniavolenaha pieraviali ŭ turmu z bolej strohimi ŭmovami ŭtrymańnia», — skazaŭ były advakat Aŭtuchoviča. Pavodle jaho słoŭ, u vypadku pieravodu ŭ turmu Aŭtuchovič adbudzie tam uvieś termin pazbaŭleńnia voli, pryznačany jamu sudom. «Jon budzie pazbaŭleny zvyčajnych turemnych radaściaŭ, — abmiežavany ŭ prahułkach, u pieradačach, u spatkańniach z rodnymi», — adznačyŭ Sapiełka.
Nahadajem, u mai 2010 hoda vaŭkavyski pradprymalnik Mikałaj Aŭtuchovič rašeńniem Viarchoŭnaha suda byŭ pryhavorany da piaci hadoŭ i dvuch miesiacaŭ pazbaŭleńnia voli z adbyvańniem pakarańnia ŭ kałonii strohaha režymu za pieravozku i zachoŭvańnie piaci patronaŭ da palaŭničaj vintoŭki.
Pravaabaroncy ličać Aŭtuchoviča palitźniavolenym, ukazvajučy na surjoznyja pracesualnyja parušeńni, zafiksavanyja padčas suda.