Łukašenka ŭpeŭnieny ŭ stabilizacyi situacyi ŭ Siryi
Kiraŭnik Biełarusi ŭpeŭnieny, što situacyja ŭ Siryi stabilizujecca. Pra heta jon zajaviŭ siońnia, sustrakajučysia z nadzvyčajnym i paŭnamocnym pasłom Siryi ŭ Biełarusi Farukam Tachaj, jaki zaviaršaje svaju dypłamatyčnuju misiju ŭ Biełarusi.
Jak adznačyŭ Łukašenka, z nahody zaviaršeńnia dypłamatyčnaj misii jon sustrakajecca nie z usimi pasłami, a ŭ asnoŭnym z tymi, chto źjaŭlajecca siabrami Biełarusi. «I kali rasstaješsia ź siabrami — heta zaŭsiody krychu sumna. Tym bolš, nie budziem chavać, u toj situacyi, u jakoj znachodzicca vaša kraina. Tamu heta ŭnosić niejkuju niavyznačanaść», — skazaŭ Łukašenka.
«Ale vy pavinny viedać, što Biełaruś dla vas — kraina nie čužaja. Vy ŭ luby čas možacie siudy pryjechać, tady, kali vam heta spatrebicca», — padkreśliŭ kiraŭnik dziaržavy, źviartajučysia da dypłamata.
Łukašenka taksama vykazaŭ pierakanańnie ŭ tym, što situacyja ŭ Siryi stabilizujecca. «Ja chaču, kab situacyja ŭ vašaj krainie stabilizavałasia. Ja ŭpeŭnieny, što heta adbudziecca nie siońnia, dyk zaŭtra. Ale chaciełasia b, kab hetaja stabilnaść, jakaja zapanuje ŭ Siryi, spryjała palapšeńniu našych adnosin», — adznačyŭ Łukašenka.
Kiraŭnictvu Siryi Łukašenka paprasiŭ pieradać samyja ciopłyja słovy padtrymki ŭ ciapierašni ciažki čas. «My ŭ Biełarusi vielmi chacieli b, kab usio skłałasia narmalna. I ja ŭpeŭnieny, što tak budzie», — skazaŭ jon.
U svaju čarhu pasoł Siryi padkreśliŭ, što patencyjał dvuchbakovych adnosin Biełarusi i Siryi vializny i vykazaŭ nadzieju na dalejšaje plonnaje raźvićcio supracoŭnictva.