Dźvie vuścišna maroznyja nočy: prahnoz iznoŭ pahoršaŭ
Chto moža, pakidajcie dźviery padjezdaŭ niezamknionymi. Kali bačycie pjanych na vulicach, adrazu vyklikajcie da ich «chutkuju dapamohu» ci milicyju.
Photo.bymedia.net.
Tempieratura pavietra minułaj nočču była na ŭzroŭni minus 25–30 hradusaŭ, a na mieteastancyjach Kličaŭ i Brahin pavietra achałodžvałasia da minus 31 hradusa. Tolki na krajnim paŭdniovym zachadzie, vakoł Bresta, marazy byli słabiejšyja — minus 23–24 hradusy. U biełaruskaj stalicy było minus 26 hradusaŭ.
Piatnica i subota mohuć stać samymi chałodnymi dniami hetaj zimy. U Minsku, Hrodnie, centry i na Vilenščynie tempieratura apuścicca da minus 29, a ŭ subotu da minus 30. U Viciebsku i na poŭnačy — da minus 29. A ŭ Mahilovie i na ŭschodzie — navat da minus 34 hradusaŭ!Tolki ŭ Bieraście možna jechać hrecca: tam abiacajuć «usiaho» minus 25.
Takija marozy stvarajuć nadzvyčajnuju situacyju: pry minus 30 moža nie zavodzicca aŭtatranspart, mohuć vymiarzać sady i kvietniki.
Učora Ministerstva achovy zdaroŭja rekamiendavała spynić zaniatki ŭ tych škołach, dzie dzieciam daloka dabiracca. U sadkach dziaciej pierastali vyvodzić na prahułki.
Lutaŭskija marazy apanavali nie tolki Biełaruś, a cełuju Jeŭropu. Heta arktyčny antycykłon spoŭz i zatrymaŭsia nad našym kantynientam.
Ukraina prypyniła ekspart elektraenerhii ŭ Biełaruś: lutyja marazy pryviali da rezkaha rostu spažyvańnia elektryčnaści ŭ našych susiedziaŭ.Na ščaście, vialikich zbojaŭ u padačy ciapła i enerhii pakul nidzie nie fiksujecca. Kamunalnaja haspadarka pakul vydatna vytrymlivaje ekstremalnyja ŭmovy pracy.
Pry mocnym marozie małym dzieciam niamožna hulać bolš za 10–20 chvilin.Treba raścirać im nos i ščoki, kab nie było abmaražeńnia.
Vopratka musić być šmatsłojnaj i svabodnaj, kab miž słajami trymałasia ciopłaje pavietra. Najlepš sahraje ciopłaje pićcio, ale nie varta pić žežkaje pierad vychadam na dvor, kab nie rasparycca.
Samaja častaja prablema z aŭtamabilami ŭ maroz — razradka akumulatara.Adnak i letniaje dyzpaliva, i znošanyja śviečy zapalvańnia, i nieadpaviednaja tempieraturam aliva taksama mohuć stać pryčynaj prablemaŭ jak u bienzinavych, tak i dyzielnych aŭtamabilach. Varta viedać, što pry takich nizkich tempieraturach znos ruchavika maksimalny. Tamu pajezdki varta abmiežavać nie tolki ź mierkavańniaŭ biaśpieki, ale i dziela ekanomii.
Isnuje pahroza žyćciu biazdomnych hramadzian, a taksama tych viaskoŭcaŭ, chto žyvie ŭ chałodnych chatach.
U roznych krainach Uschodniaj Jeŭropy zamiorzła 163 asoby. Pa Biełarusi takich źviestak niama: achviary jość i ŭ nas, ale asobny ŭlik u našaj krainie nie viadziecca.
Chto moža, pakidajcie dźviery padjezdaŭ niezamknionymi. Kali bačycie pjanych na vulicach, adrazu vyklikajcie da ich «chutkuju dapamohu».