«Libieralnamu kłubu» admovili ŭ praviadzieńni debataŭ pra adnosiny Biełarusi i ES

Mierapryjemstva było zapłanavana na 2 sakavika ŭ halerei «Ŭ»

Sa słoŭ Mikity Bialajeva, administratyŭnaha dyrektara «Libieralnaha kłuba», z halerejaj «Ŭ» była damoŭlenaść ab vykarystańni pamiaškańnia dla praviadzieńnia debataŭ. Adnak siońnia jamu pa telefonie paviedamili, što admovilisia. Maŭlaŭ, niaŭvažliva pračytali zajaŭku i nie viedali, što mierapryjemstva palityčnaje, a ŭ halerei inšaja skiravanaść.

Tema mierapryjemstva, jakoje źbiraŭsia ładzić «Libieralny kłub», — «U pošuku idejaŭ dla palapšeńnia adnosinaŭ ES i Biełarusi». Siarod ekśpiertaŭ, što mieli brać udzieł — Alaksandr Filipaŭ (Infarmacyjna-analityčny centr pry Administracyi prezidenta), Alaksandr Adamianc (Centr jeŭrapiejskich daśledavańniaŭ), a taksama pradstaŭnik Delehacyi Jeŭrapiejskaha sajuza ŭ Biełarusi.

U zaprašeńni na mierapryjemstva miž inšaha adznačałasia: «Voś užo bolš za hod adnosiny Biełarusi i Jeŭrapiejskaha sajuza znachodziacca ŭ tupiku. Łavinapadobna biahučy kanflikt atrymlivaje usio novyja prajavy, raźvivajučysia na fonie ekanamičnych ciažkaściaŭ abapał Šenhienskaj miažy i novaj chvali intehracyi na postsavieckaj prastory. Pry hetym abodva baki majuć žadańnie „razmarozić“ składzieny status-kvo, adnak z ulikam roznych pryčynaŭ zrabić heta nie ŭdajecca. Niadaŭna stała viadoma, što ŭ asiarodku instytutaŭ ES rychtujecca novaja inicyjatyva dla Biełarusi — Dyjałoh dla madernizacyi».

Halereja «Ŭ» — nie pieršyja, što admoviŭ u pamiaškanii dla debataŭ na jeŭratematyku. Zapyt byŭ nakiravany ŭ roznyja hateli horada Minska, dzie raniej nieadnarazova ładzilisia mierapryjemstvy kłubu. Adnak hetym razam zajaŭnikam ci admaŭlali adrazu, ci paśla paviedamlali, što niama miescaŭ.

Kamientary da artykuła