Chłopca z Navapołacku abviaścili «fašystam» z padačy KDB
Asoba 19-hadovaha Dźmitryja Ryžyčenki stała pradmietam hutarki ŭ Navapołackim harvykankamie, jakuju pravodziŭ supracoŭnik KDB dla miascovych žurnalistaŭ.
Biez sudu i śledztva supracoŭnik nazvaŭ chłopca ekstremistam, a siužet, dzie heta mierkavańnie było ahučana, užo prajšoŭ pa miascovym telebačańni studyi «Viektor TV».
Na naradu ŭ harvykankam zaprasili i niezaležnych žurnalistaŭ, u pryvatnaści, redaktara i stvaralnika niezaležnaha sajtu «Svabodny rehijon» Jaŭhiena Parčynskaha:
«U kabinet namieśnika staršyni Viačasłava Durnova byli zaprošanyja hałoŭny redaktar "Novaj haziety" Alaksandar Papko, dyrektar kabelnaj televizii «Vektar» Alaksandar Asienka, karespandent sajtu «Ximik. info» Alaksandar Muždabajeŭ.
Da nas źviarnuŭsia supracoŭnik Navapołackaha adździełu KDB — mienavita tak paprasiŭ nazyvać jaho małady čałaviek, jaki adrazu padkreśliŭ, što sutnaść hetaj sustrečy zaklučajecca ŭ daniasieńni da ludziej infarmacyi pra dziejnaść Dźmitryja Ryžyčenki i hramadzkaj arhanizacyi «Sumleńnie-18».
Pavodle słovaŭ supracoŭnika KDB, usia hetaja historyja pačynajecca z krasavika 2010 hodu, kali ŭ Navapołacku źjavilisia nadpisy prafašysckaha źmiestu. Supracoŭnik zaŭvažyŭ, što niekatorym fihurantam raspačataj z hetaj nahody kryminalnaj spravy ŭdałosia paźbiehnuć pieraśledu, bo ŭ ich «byli suviazi ŭ vysokich kołach». Ciapier pad uvahu KDB trapiŭ Dźmitry Ryžyčenka, syn navapołackaj aktyvistki Partyi BNF Volhi Damaskinaj».
16 lutaha ŭ kvatery, dzie žyvie siamja Dźmitryja Ryžyčenki byŭ praviedzieny pieratrus. Paśla jaho byli kanfiskavany noŭtbuk, systemny blok kamputara i balončyk ź biełaj farbaj — jaje nabyli, kab zafarbavać drapiny na pralnaj mašynie. U pratakole zabranych rečaŭ, jaki sfatahrafavała maci Dźmitryja. nie była paznačana «fłeška», jakaja potym «znajšłasia» ŭ KDB. Na joj adniekul źjavilisia fajły, jakich pieršapačatkova nie było, i zapis pra kanfiskacyju «fłeški» źjaviŭsia tolki ŭ inšym pratakole, vydadzienym haspadaram kvatery ŭžo praź niekalki dzion, raspaviała sajtu «Viasny» Volha Damaskina.
Adrazu paśla pieratrusu jana źviarnułasia da niezaležnych žurnalistaŭ. A nastupnym viečaram jaje syna Dźmitryja Ryžyčenku ŭ dvary ŭłasnaha domu źbili nieviadomyja.
24 lutaha, jašče da sustrečy ŭ Navapołackim harvykankamie, pa miascovym televizijnym kanale «ViektorTV» navin byŭ pakazany siužet, pryśviečany dziejnaści «ultrapravaj moładzievaj hrupy». Hledačam nie paviedamili, jakim čynam da zdymačnaj hrupy trapili źviestki pra Dźmitryja Ryžyčenku, asobie jakoha była pryśviečana bolšaja pałova videasiužetu. U im fihuravali i fotazdymki, uziatyja z kanfiskavanaha pry pieratrusie kamputara. Na niekatorych, pavodle Dźmitryja Ryžyčenki, zroblenych u časie prachodžańnia dapryzyŭnaj padrychtoŭki, maładyja ludzi stajać sa zbrojaj u rukach. U siužecie zhadana taksama, nibyta chłopiec prosić palityčnaha prytułku ŭ zamiežžy, «kab tam šyrej prapahandavać fašystoŭskija idei».
Dźmitry Ryžyčenka heta kateharyčna abviarhaje. Telesiužet «Viektora TV» jon ličyć paklopnickim i rychtuje skarhi na parušeńni jaho pravoŭ. Inšyja miascovyja ŚMI atrymanuju na naradzie infarmacyju z KDB nie skarystali.