Śpiavačka Valeryja: Biełaruś – heta Šviejcaryja

28.03.2012 / 13:29

Juraś Uskoŭ

Siońnia rasiejskaja pop-zorka daje ŭ Minsku jubilejny kancert.

Muž-pradziusar Valeryi Iosif Pryhožyn.

Zvyčajnaja siamiejnaja para.

U Minsk śpiavačka, čyja pieśnia pra «časiki» hučała z kožnaha papsovaha prasa, pryjechała adznačać dvaccacihodździe na scenie.

Pa-za scenaj Valeryja vyjaviłasia troški nie takoj, jak my ŭjaŭlajem rasijskich pop-zorak. Nijakich ekscesaŭ, nakštałt Kirkorava z «ružovaj koftačkaj». Pres-kanfierencyja, na jakuju sabrałasia zusim niašmat žurnalistaŭ, płaŭna pierarasła ŭ niešta siaredniaje pamiž śvieckaj hutarkaj i kuchonnymi pasiadziełkami.

Prajavaŭ «zornaści» Valeryja i jaje muž-pradziusar Iosif Pryhožyn, ź jakim jana hastraluje, nie demanstravali. Nie było ŭražańnia, što tyja prajavy ŭvohule charakternyja dla ich.

Navat z manałoham adnoj z žurnalistak stałaha vieku, jakaja davodziła, što płan padryvu ruskaj duchoŭnaści byŭ raspracavany ŭ Amierycy ŭ 1973 hodzie, jany miakka i intelihientna pahadzilisia.

Tema tvorčaści Valeryi kali i zakranałasia, dyk tolki z padačy Pryhožyna.

Muž-pradziusar pachvaliŭsia, što novaja pieśnia Valeryi była zapisana ŭ Halivudzie z arkiestram,

a taksama skazaŭ, što chutka źjavicca novy DVD-dysk śpiavački. Pryhožyn chvaliŭsia, što dakładna viedaje, jak zrabić z rasijskaj zorki suśvietnuju znakamitaść — paśla hastrolaŭ u Anhlii, dzie Valeryja vystupiła razam z Simply Red, schiema ŭ jaho skłałasia kančatkova. Što ž, pabačym, jak jamu ŭdasca hety ekśpierymient z žonkaj.

Žurnalisty na «śpieŭnyja» temy reahavali mlava. Uvieś astatni čas abmiarkoŭvali prablemy duchoŭnaści, albo jaje adsutnaści ŭ šou-biznesie, sakralnaje «hrošy — heta nie hałoŭnaje» i… krainy Bałtyi.

Zornaja para, jakaja tolki što pryjechała z Ryhi, aburałasia łatvijskaj palitykaj: «Navošta im hety ES, usie źjechali, zavody stajać, moładź uciakaje ŭ Anhliju, zastajucca tolki ruskija piensijaniery, u jakich imknucca adabrać movu». I dalej pa tekście telekanała «Rośsija».

«Treba, kab palityki ŭsie pamiž saboj damovilisia, i zrabili tak, kab usim było choraša», — ahitavała za mir va ŭsim śviecie Valeryja.

Pryhožyn kazaŭ, što palityčnyja temy jaho cikaviać vielmi: padziei ŭ Afrycy (Valeryja tam vystupała i zrabiła vialikaje ŭražańnie na kiraŭnikoŭ miascovych respublik);

intehracyja krainaŭ Bałtyi ŭ ES, a taksama niemahčymaść viartańnia SSSR (što Pryhožyna raduje).

Temu prezidenckich vybaraŭ u Rasii tak i nie zakranuli.

Zatoje chvalili Biełaruś.

Valeryja žartam nazyvaje jaje Šviejcaryjaj — darohi, šyrokija vulicy, pavietra i draniki. «I kali idzieš nočču pa parku, to zusim nie strašna».

Niezrazumieła, praŭda, čamu tady zornaja para zavitała navat na pres-kanfierencyju ŭ supravadžeńni bujnahabarytnych maładych ludziej.

Karaciej, vyjavilisia Valeryja z mužam, zvyčajnaj siamiejnaj paraj, jakaja, pierabivajučy adno adnaho, imknucca vykazać adnu i tuju ž dumku. I tak dvaccać hadoŭ, pad akampaniemient «časikaŭ».

Čytajcie taksama:

Kamientary da artykuła