Zamiest Kanhresu — Kanferencyja
Jaje maje prava sklikać Milinkievič. Prapanuje Leanid Haravy z Haradka.
Dva miesiacy paśla miascovych vybaraŭ stali dla apazycyi pierš za ŭsio časam vyśviatleńnia adnosin da Kanhresu demakratyčnych siłaŭ. Hetyja 60 dzion nie dadali adzinstva apazycyi — stvoranaja pahadnialnaja kamisija pavinna pierš za ŭsio praduchilić raspad chistkaj apazycyjnaj kaalicyi. Kamieniem spatyknieńnia dla vuzkapartyjnych intaresaŭ staŭ mechanizm padrychtoŭki i praviadzieńnia KDS.
Niezaležnaja presa davoli šmat vykazvałasia pra roznaści padychodaŭ apazycyi da Kanhresu. I čym bližej data forumu, tym bolš niavyśvietlenych pytańniaŭ uźnikaje: ad lehitymnaści mierapryjemstva da jakaści i źmiastoŭnaści prapanavanych da zaćviardžeńnia dakumentaŭ. Pry ŭsioj strakataści acenak dziejnaści kiraŭnictva ADS nie vyklikaje sumnievu nizkaja efektyŭnaść hetaj dziejnaści i minimalny ŭzrovień davieru pamiž apazycyjnymi subjektami. Subjekty kiraŭnictva ADS imknucca pieradusim pierajhrać svaich partneraŭ i mienš za ŭsio dumajuć pra pieramohu nad režymam. Partyjnym funkcyjaneram bolej za ŭsio spadabajecca siabravać suprać Milinkieviča, a nie supolna zmahacca suprać dyktatury. U hetych umovach praviadzieńnie čarhovaha KDS nijak nia moža stać etapam kansalidacyi apazycyi, bo na jaho, pa‑pieršaje, amal kožnaja struktura idzie sa svaim bačańniem budučyni i maje pra jaje svaju praŭdu — ad liberałaŭ da kamunistaŭ, a pa‑druhoje, šmatlikija źmieny ŭmovaŭ pradstaŭnictva i časam vidavočnaja falsyfikacyja mandataŭ delehataŭ nia moža nadać lehitymnaści rašeńniam forumu. Dy i delehatam Kanhresu pa zaviadzioncy budzie prapanavana prahałasavać amal aŭtamatyčna za tyja Małyja Kanstytucyi, Pastanovy, Rezalucyi, jakija prapanuje arhkamitet, biez papiaredniaha abmierkavańnia ŭ nizavych strukturach kaalicyi.
Dla apazycyi zaraz skłałasia sytuacyja cuhcvanhu. Kožny kirunak vybaru viadzie da paharšeńnia stanovišča: kiepska pravodzić słaba padrychtavany i nielehitymny Kanhres, ale taksama kiepska adkładać demakratyčny forum da 2008 h., bo zmarnujecca praca dziasiatkaŭ aktyvistaŭ apazycyi pa zbory podpisaŭ za delehactva na Kanhresie.
Jakoje ž moža być vyjście z hetaha stanovišča? Što moža stać pazytyŭnym krokam dla kansalidacyi apazycyi? Pazytyŭnym vyjściem z dadzienaha stanovišča mahło b stać praviadzieńnie ahulnademakratyčnaj Kanferencyi. I voś čamu…
Pieršym kamieniem spatyknieńnia apanentaŭ Milinkieviča i jahonaj kamandy stała acenka prezydenckaj kampanii 2006 h. Samy mocny zakid da Alaksandra Milinkieviča jahonyja apanenty robiać z taje nahody, što jon nia vykarystaŭ mahčymaści 19 sakavika 2006 h. atrymać pieramohu i tym samym straciŭ svoj mandat adzinaha kandydata. Pretenzii na jahony adras vystaŭlajuć nakštałt taho, što Milinkievič nia staŭ Haponam i nie pavioŭ narod da «baćki» abo na barykady. Ale daśviedčanyja analityki, palitolahi adnaznačna miarkujuć, što najaŭnaść na vulicy 30 tysiač hramadzian — nieabchodnaja ŭmova, ale nie dastatkovaja. Hramadzian pavinna być u 5—10 razoŭ bolš, i tolki tady ich vystupy mohuć być plonnymi.
Kali ž vystaŭlać pretenzii da Milinkievičava štabu, dyk pierš za ŭsio za toje, što zmarnavany ŭvieś emacyjny ŭzdym viasny 2006 h., u apazycyi nie dadałosia muskułaŭ, dy i nia byŭ dadzieny adkaz na adviečnaje pytańnie «Chu iz chu?» u čas prezydenckaj kampanii. Mienavita tut mahčyma pahadzicca z apanentami adzinaha kandydata, što abjadnanaja apazycyja nie zrabiła jakasnaha analizu vynikaŭ vybarčaj kampanii, i dla šyrokaj hramadzkaści tak i zastalisia nieviadomymi ŭnioski subjektaŭ kaalicyi ŭ ahulny vynik. I šmat chto ź siońniašnich apanentaŭ Milinkieviča prypadabniajecca da toj muchi, što kazała vału: «I ja arała»...
Ale ŭ hetym i palahaje siońnia resurs dla kansalidacyi biełaruskaj apazycyi. Hałoŭnym rašeńniem papiaredniaha Kanhresu było abrańnie adzinaha kandydata Alaksandra Milinkieviča i rašeńnie ab supolnaj pracy na pieramohu ŭ 2006 h. Milinkievič i ciapier maje poŭnaje prava i abaviazany pravieści Kanferencyju aktyvistaŭ apazycyi, jakija nie na słovach, a ŭ sapraŭdnaści pracavali na vybarach 2006 h., jakija paciarpieli ad dyktatury. I partyjnyja funkcyjanery pavinny padparadkavacca takomu rašeńniu, bo jano budzie adpaviadać duchu Kanhresu 2005 h., na jaki tak lubiać asobnyja ź ich spasyłacca ciapier. Da ŭdziełu ŭ pracy Kanferencyi mohuć być zaprošany j tyja hramadzianie, jakija na spravie vykanali rašeńnie Kanhresu: naprykład, sabrali za adzinaha kandydata pa 100 i bolej podpisaŭ abo pryniali ŭdzieł u sakavickich padziejach i stali achviarami karnych orhanaŭ. I heta budzie lehitymny forum realnych zmaharoŭ z režymam, jakija dobra adčuvajuć puls času. Miarkuju, što siarod ich budzie i bolšaść tych, chto na miascovych vybarach realna sabraŭ 300 podpisaŭ vybarščykaŭ. Pytańnie pra ŭdzieł u Kanferencyi pradstaŭnikoŭ BSDP(Hramada) moža vyrašycca šlacham pieradačy mandataŭ tym siabram Hramady, jakija brali ŭdzieł u Kanhresie 2005 h. i tady ŭdzielničali ŭ kansalidacyi biełaruskaj apazycyi.
Takaja sustreča aktyvistaŭ demakratyčnych siłaŭ moža stać pieršaj demakratyčnaj Kanferencyjaj, jakaja abmiarkuje hałoŭnyja pytańni času: pryncypy i mechanizmy kansalidacyi apazycyi, demakratyčnuju alternatyvu dyktatury, stratehiju i plan dziejańniaŭ apazycyi, prapanovy pa stvareńni Ŭradu narodnaha adzinstva. Liču, što ŭ siońniašnich varunkach adsutnaści lehitymnaj prezydenckaj ułady demakratyčnym siłam varta abmierkavać pytańnie ab Uradzie narodnaha adzinstva. Nam, hramadzianam Biełarusi, treba być adzinymi dziela abarony niezaležnaści krainy, dziela adekvatnaha adkazu pahrozam, jakija ŭźnikli ŭ apošni čas. Da Kanferencyi patrebna pravieści abmierkavańnie prajektaŭ rašeńniaŭ forumu ŭ nizavych strukturach, kab pry praviadzieńni kruhłych stałoŭ Kanferencyi mahčyma było pryniać kansalidavanaje rašeńnie. Mienavita taki alharytm padrychtoŭki i praviadzieńnia forumu dazvolić pryniać najbolš jakasnyja rašeńni, prademanstruje adkrytaść i hałosnaść pry pryniaćci rašeńniaŭ demakratyčnymi siłami.
Siońnia realna vieści havorku ab praviadzieńni Kanferencyi praź miesiac‑dva, kali buduć hatovyja prajekty jaje rašeńniaŭ. Mienavita na hruntoŭna padrychtavanaj Kanferencyi budzie mahčymaść nablizicca da parazumieńnia ŭ demakratyčnych siłach, bo kansalidacyja apazycyi jość hałoŭnaj ŭmovaj dla pieramohi nad režymam.