Pradprymalniki HC «Parkinh» hatovy vyjści na vulicu i pratestavać
Pradprymalniki staličnaha handlovaha centra «Parkinh» hatovy vyjści na vulicu i pratestavać suprać rezkaha pavyšeńnia koštu arendy.Pra heta zajaviła člen Savieta pa raźvićci pradprymalnictva ŭ Biełarusi, staršynia savieta IP u HC «Parkinh» Kaciaryna Čyžyk.
Pavodle jaje słoŭ, jašče 27 sakavika ŭłaśniki «Parkinha» prainfarmavali indyvidualnych pradprymalnikaŭ ab tym, što 1 krasavika košt arendy pavialičycca ŭ try razy — z 415 tys. da 1 młn. 180 tys. rubloŭ za kvadratny mietr.
Adnak paśla padpisańnia prezidentam 29 sakavika ŭkaza № 150 «Ab niekatorych pytańniach arendy i biazvypłatnaha karystańnia majomaściu» ŭłaśniki pierahledzieli svaju pazicyju i pryniali rašeńnie pavialičyć košt arendy da 85 jeŭra za kvadratny mietr (krychu bolš za 920 tys. rubloŭ).
Jak rastłumačyła Čyžyk, pavodle ŭkaza farmiravańnie arendnaj płaty za handlovyja miescy na rynkach i ŭ handlovych centrach, što znachodziacca ŭ pryvatnaj ułasnaści, ažyćciaŭlajecca ŭ adpaviednaści z normami Hramadzianskaha kodeksa pa ŭzhadnieńni bakoŭ. «I ŭłaśniki „Parkinha“ vyrašyli adrazu rezka pavialičyć košt arendy», — adznačyła pradprymalnik.
Pavodle słoŭ Čyžyk, uładalniki handlovaha centra razdali arandataram dadatkovyja pahadnieńni, prymusova naviazaŭšy canu 85 jeŭra za kvadratny mietr. Pry hetym IP paviedamili, što niepadpisańnie dadatkovaha pahadnieńnia paciahnie skasavańnie arendnaha dahavora ŭ adnabakovym paradku. «Nam dali termin vypłacić usio da 5 krasavika», — udakładniła Čyžyk.
Nasupierak patrabavańniam arandadaŭcy, schodam IP, pavodle słoŭ Čyžyk, było pryniata rašeńnie apłacić arendu ŭ adpaviednaści z dahavoram, padpisanym abodvuma bakami terminam na hod, da śniežnia 2012 hoda, u jakim zafiksavany košt kvadratnaha mietra ŭ 415 tys. rubloŭ.
Adnak ułaśniki «Parkinha» apaviaścili pradprymalnikaŭ, što sumy, apłačanyja arandatarami pa raniejšych staŭkach, buduć zaličany na rachunak kamunalnych płaciažoŭ i nie buduć razhladacca jak płata za arendu handlovych miescaŭ.
Dziejańni ŭładalnikaŭ «Parkinha» Čyžyk ličyć biaźmiežžam. «Kali jon ułaśnik, to jon što, maje prava adnamomantna rezka pavialičyć košt arendy, choć dahavor zaklučany na hod?» — zapytała Čyžyk.
Pavodle jaje słoŭ, «košt arendy, što naviazvajecca IP, nieadekvatny i źjaŭlajecca vielmi hibielnym dla drobnaha biźniesu». «Parkinh» byŭ zacikaŭleny va ŭzbujnieńni handlovych miescaŭ. U vyniku kožny pradprymalnik siońnia aranduje handlovyja miescy płoščaj 15–20 kvadratnych mietraŭ. Z ulikam novaj arendy zatraty atrymlivajucca vielizarnymi», — kanstatuje Čyžyk.
Nie žadajučy mirycca z takim stanoviščam, IP handlovaha centra ŭžo źviarnulisia sa skarhaj u Minharvykankam i da namieśnika kiraŭnika Administracyi prezidenta Andreja Tura.
Pavodle słoŭ Čyžyk, pradprymalniki časova spynili pracu i hatovy vyjści na vulicu z pratestami, kab pryciahnuć uvahu hramadskaści i ŭład da prablemy arendy.
«Ale ŭsio ž jość nadzieja, što prablemu atrymajecca ŭrehulavać mirnym šlacham. Ciapier, na samoj spravie, nie chočacca pratestavać, usie chočuć prosta pracavać u narmalnych umovach», — padkreśliła Čyžyk.
Andrej Kažamiakin, BiełaPAN.