Baraŭlany pratestujuć suprać budaŭnictva chimzavoda

21.04.2012 / 12:26

JAM

Niebiaśpiečnaje pradpryjemstva maje adkrycca za niekalki kiłamietraŭ ad Minska.

U subotu prachodzić u Baraŭlanach schod suprać budaŭnictva, fota z fejsbuka Sieržuka Siemianiuka

Žychary viosak Drozdava i Malinaŭka Baraŭlanskaha sielsavieta bjuć tryvohu. Na ŭčastku pamiž ich nasielenymi punktami, za paru kiłamietraŭ ad Minska, kampanija SAAT «M-Standart» maje pabudavać zavod pa vytvorčaści chimičnych srodkaŭ. Žychary elitnych katedžavych pasiołkaŭ, viadoma ž, suprać.

Jany kuplali svaje ŭčastki za $50–70 tysiač dla taho, kab žyć u čystym miescy, biez zabrudžanych hruntovych vodaŭ.

Historyja pačałasia jašče ŭ sakaviku 2010 hoda, kali Minabłvykankam zaklučyŭ inviestycyjnuju damovu z SAAT «M-Standart». Zhodna ź joj, kampanija atrymała 5,55 ha ziamli, na jakich u žniŭni 2012 hoda maje adkrycca vytvorčaść.

Na zavodzie buduć vypuskać achaładžalnuju vadkaść dla dyzielnych aŭtamabilaŭ i śpiecyjalny reahient.

Ahulny abjom vytvorčaści na pieršym etapie składzie pryblizna pa 4 tysiačy ton pieršaha i druhoha praduktu. U atmaśfieru pry hetym budzie traplać 2,8 tony škodnych vykidaŭ štohod.

Drozdaŭcaŭ taki varyjant nie zadavalniaje. Jany adznačajuć, što, zhodna z płanam raźvićcia pryharadnaj zony Minska, budaŭnictva chimičnych pradpryjemstvaŭ u hetym miescy ŭ pryncypie zabaroniena. Ale pracy ŭsio adno pravodziacca. «Na praciahu 2011–2012 hadoŭ zasvojena 27,8 miljarda rubloŭ, stvorana 31 pracoŭnaje miesca», — havorycca ŭ aficyjnym adkazie drozdaŭcam, padpisanym namieśnikam staršyni abłvykankama Alaksandram Jermakom.

Čynoŭnik davodzić, što vykonvajucca ŭsie patrebnyja normy: dazvoł ad abłasnoha kamiteta pryrodnych resursaŭ i achovy navakolnaha asiarodździa atrymany, sanitarna-achoŭnaja zona składaje nie 50 mietraŭ, jak patrabuje zakanadaŭstva, a navat 100 mietraŭ.

Voś tolki žychary viosak usio adno nie razumiejuć, navošta budavać pradpryjemstva mienavita kala Minska.

Kali pradać ziamlu zavoda pad katedžy, biudžet moža atrymać bolš za $1 miljon. «U čym zaklučajecca inavacyjnaść vytvorčaści, jakoj tak chvalicca „M-Standart“? — aburajecca pradstaŭnik inicyjatyŭnaj hrupy Uładzimir, jaki rasklejvaje infarmacyju pra niebiaśpiečnaje susiedstva. — Pryviazuć chimikaty z-za miažy, na adkrytaj placoŭcy buduć źlivać etylenhlikol z aŭtacysternaŭ u niejkija jomistaści, a paśla ŭručnuju raźlivać u płastykavyja kantejniery. Heta faktyčna prapisana ŭ prajekcie».

Kanalizacyja ŭ prajekcie adsutničaje, atrymlivajecca, što ścioki pojduć u hlebu. Jość ryzyka zabrudžvańnia hruntovych vodaŭ. Heta nie admaŭlajuć i ŭ Ministerstvie achovy pryrody, uličvajučy mahčymyja prablemy ŭ nastupnych pakaleńniaŭ drozdaŭcaŭ. «Pry raspracoŭcy prajekta ŭličana tearetyčnaja vierahodnaść zabrudžvańnia padziemnaha vadanosnaha hruntu, jakaja ŭ vypadku avaryjnych situacyj dasiahnie jaho praz 50 hadoŭ», — adkazała namieśnica ministra Halina Vaŭčuha.

Pradstaŭniki kampanii «M-Standart» nie kamientujuć situacyju, rajačy źviartacca da čynoŭnikaŭ.

Siońnia, 21 krasavika, u Baraŭlanach pačynajecca vialiki schod suprać budaŭnictva chimzavoda.

Čytajcie taksama:

Kamientary da artykuła