Hienieralny kantrakt na budaŭnictva biełaruskaj AES płanujecca padpisać 17 červienia

Hienieralny kantrakt na budaŭnictva biełaruskaj atamnaj elektrastancyi płanujecca padpisać 17 červienia. Pra heta havorycca ŭ paviedamleńni, raźmieščanym na sajcie AAT «NIAEP» (pradpryjemstva dziaržkarparacyi «Rasatam»), jakoje źjaŭlajecca kiraŭnickaj kampanijaj ZAT «Atambudekspart».

10 maja ŭ Astraŭcy (Hrodzienskaja vobłaść) adbyłosia pasiadžeńnie druhoha apieratyŭnaha štaba pa pabudovie AES pad staršynstvam pieršaha namieśnika prem'jer-ministra Biełarusi Uładzimira Siamaški.

Udzielniki pasiadžeńnia ahledzieli budaŭničuju placoŭku biełaruskaj AES. Zaraz tut iduć raboty pa pabudovie administracyjna-bytavoha kompleksu, jaki ŭklučaje budynki hienpadradčyka i zamoŭcy, ofis dyrekcyi sa štabam, abjekty armaturnaj i składskoj haspadarak, a taksama stałovuju na 500 miescaŭ.

Raspracoŭka katłavana pavinna pačacca 31 maja, hienpadradčyk pa ziamielnych rabotach budzie vyznačany ŭ chutkim časie.

Kali ŭ 2012 hodzie zapłanavany abjom budaŭniča-mantažnych rabot (BMR) składaje 40 młn. dołaraŭ, to ŭ 2013 hodzie taki ž abjom BMR treba budzie vykanać za pieršy kvartał. Kolkaść rabočych da kanca nastupnaha hoda pavinna ŭzraści da 2.600 čałaviek. U mai na placoŭcy buduć pracavać 245 rabočych.

Kantrakt na budaŭnictva pieršaj čarhi AES byŭ padpisany ZAT «Atambudekspart» i biełaruskaj dziaržustanovaj «Dyrekcyja budaŭnictva atamnaj elektrastancyi» 11 kastryčnika 2011 hoda ŭ Sankt-Pieciarburhu. Jon praduhledžvaje budaŭnictva pad kluč dvuch enierhabłokaŭ AES ahulnaj mahutnaściu da 2.400 MVt z reaktarnaj ustanoŭkaj V-491.

Biełaruskaja AES budzie budavacca na ŭmovach poŭnaj adkaznaści rasijskaha hienpadradčyka i na rasijskija hrošy. 25 listapada 2011 hoda było padpisana mižuradavaje pahadnieńnie ab vydzialeńni ŭradu Biełarusi dziaržaŭnaha ekspartnaha kredytu dla budaŭnictva AES. Razmova idzie pra 10 młrd. dołaraŭ ZŠA.

Pieršy błok biełaruskaj AES płanujecca ŭvieści ŭ stroj u 2017 hodzie, druhi — u 2018-m.

Kamientary da artykuła