U Kryčavie chočuć pastavić pomnik Uładzisłavu IV Vazu
Jon daŭ kryčaŭcam Mahdeburhskaje prava.
U Kryčavie 13 maja prajšoŭ kruhły stoł, dzie byli razhledžany histaryčnyja i sučasnyja asablivaści miascovaha samakiravańnia ŭ śviatle Mahdeburhskaha prava,380-hodździe nadańnia jakoha budzie adznačacca ŭ rajonnym centry ŭ 2013 hodzie.
Jak paviedamiŭ adzin z arhanizataraŭ kruhłaha stała Mikałaj Hierdzij, ideja mierapryjemstva zaklučajecca ŭ tym, kab pakazać hramadskaści horada, što pytańni samakiravańnia, vybarnaści miascovych orhanaŭ ułady majuć histaryčnyja karani.
«Mahdeburhskaje prava — heta adzin z momantaŭ, jaki dazvalaŭ horadu raźvivacca. U Jeŭropie miascovaje samakiravańnie raźvita tamu, što nasielnictva biare aktyŭny ŭdzieł u hramadskim žyćci. Jano kantraluje miascovuju ŭładu, i dziakujučy hetamu idzie pastupalnaje raźvićcio», — upeŭnieny hramadski aktyvist. Pavodle jaho słoŭ, meta kruhłaha stała — «razbudzić hramadskuju śviadomaść, pierakinuć most da aktualij siońniašniaha dnia».
Jak zaznačyŭ Hierdzij, na staronkach małatyražnaj kryčaŭskaj haziety «Volny horad» užo vyjšła niekalki materyjałaŭ na temu Mahdeburhskaha prava, vydadziena brašura pa pytańniach miascovaha samakiravańnia, praduhledžvajecca vypusk brašury i pa vynikach kruhłaha stała.
Padčas mierapryjemstva vystupili mahiloŭskija historyki Alaksandr Ahiejeŭ i Ihar Puškin. Arhanizatary kruhłaha stała spadziajucca, što jany, a taksama kryčaŭski historyk Andrej Miacielski zmohuć, papracavaŭšy ŭ archivach, sabrać dastatkovy materyjał dla vydańnia histaryčnych źviestak pra Mahdeburhskaje prava ŭ Kryčavie.
Siarod dziejańniaŭ na pierśpiektyvu, jakija vyznačyli 25 udzielnikaŭ mierapryjemstva, — dabivacca pierajmienavańnia vulic u Kryčavie, ustanoŭki pamiatnaha znaka ŭ honar nabyćcia horadam Mahdeburhskaha prava, uźviadzieńnia ratušy i pomnika karalu Uładzisłavu IV Vazu, jaki daravaŭ heta prava kryčaŭlanam u 1633 hodzie.
Varta nahadać, što ŭ časie biełaruska-rasiejskaj vajny XVII st., u časie abłohi Kryčava žychary horada admovilisia zdacca praciŭniku na ŭmovie vydačy žydoŭ, jakija pražyvali ŭ horadzie. Jany arhumientavali admovu tym, što jany takija ž volnyja hramadzianie horada, jak i ŭsie astatnija. Kryčaŭ u vyniku byŭ uziaty i źniščany, jak i bolšaść uschodniebiełaruskich haradoŭ.