Zatrymali Alenu Kavalenku
Jana pisała na asfalcie pierad sudom «Svabodu Siarhieju Kavalenku».
Zatrymańnie adbyłosia kala 5.40 ranicy. Alena Kavalenka razam z aktyvistkaj «Jeŭrapiejskaj Biełarusi» Alenaj Siemienčukovaj i stryječnym bratam Siarhieja rabili na asfalcie nadpis «Svabodu Siarhieju Kavalenku!»
Takim čynam zatrymanyja chacieli vykazać salidarnaść ź viaźniem, jaki druhi raz raspačaŭ haładoŭku pratestu.
18 maja ŭ 9.30 Viciebski abłasny sud budzie razhladać kasacyjnuju skarhu na rašeńnie Pieršamajskaha rajsuda, jaki prysudziŭ aktyvistu 2 hady źniavoleńnia.
«Nas zatrymali milicyjanty, jakija ŭžo ad samaha ranku pilna achoŭvali sudovy budynak. U Aleny Kavalenki zabrali fotaaparat, nas pavieźli ŭ Kastryčnicki RAUS», — paśpieła paviedamić aktyvistka Alena Siemienčukova. Praz 15 chvilin paśla zatrymańnia telefon užo nie adkazvaŭ.
Pravaabaronca Pavał Levinaŭ miarkuje, što z samaj ranicy ŭ budynku abłasnoha sudu sabralisia milicyjanty, jakija musiać stvaryć «masoŭku» — zapoŭnić sudovuju zału, kab była nahoda skazać usim astatnim, što volnych miescaŭ niama. Takaja praktyka pačała šyroka prymianiacca ŭ Viciebsku, a «vyprabavali» jaje mienavita padčas sudovaha pracesu nad Siarhiejem Kavalenkam u Pieršamajskim rajsudzie ŭ lutym.