Ź jaho pracaŭ vyžyvajuć adzinki

17.06.2012 / 8:7

Juraś Uskoŭ

Hraficist Dream stvaraje na ścienach šedeŭry tut i ciapier.

Vycinanki na vulicach Minska

"Słuchaj baćku". Anatol Jarmolenka.

Alaksandr Saładucha.

Hieroi Biełarusi na minskich ścienach.

Jon prosić nie fatahrafavać svoj tvar — u biełaruskich umovach hrafici mohuć padvieści pad artykuł «psavańnie majomaści». Fota: Siarhiej Hudzilin

Afišnaja tumba ŭ Minsku. A na joj — nalepka ź Jarmolenkam i nadpisam «Słuchaj baćku!» Heta što, takaja rekłama? Baču, pobač šansańje Viktar Kalina i nadpis «Za pacanoŭ!» E, nie, heta nie «Za Biełaruś».

Heta niekaha dastała niepatrabavalnaja pop-muzyka, što apanavała biełaruskuju estradu. I hety mastak dziejničaje suprać «abojmy» jaje ž zbrojaj: ich tvary, ich vyrazy. Lohki absurd hetaj tvorčaści stanovicca vyjaŭnym, kali jaje vyryvajuć z kantekstu.

Traplajucca prynty hordaha saboj Alaksandra Saładuchi (podpis — «Zdravstvuj, čužaja miłaja») i Papłaŭskaja ź Cichanovičam na miažy cenzurnaści.

Mastak-hraficist chavajecca pad psieŭdanimam Dream. Jon prosić nie fatahrafavać svoj tvar — u biełaruskich umovach hrafici mohuć padvieści pad artykuł «psavańnie majomaści». «Heta antypody sieryi „Hieroi Biełarusi“, — raskazvaje jon. — Ja ich stvaryŭ litaralna za viečar. Vyrašyŭ zrabić ich u styli Šeparda Fejry — mastaka, jaki pierad vybarami ŭ ZŠA stvaryŭ partret Baraka Abamy».

Pracy Dream'a bačyli mnohija. Naprykład, stensiły z vyjavami Barbary Radzivił, Ihnata Damiejki, hietmana Chadkieviča, radki z kłasičnych vieršaŭ na minskich ścienach — jaho rabota.

«U mianie była ideja — stvarać partrety vybitnych biełarusaŭ na vulicach, jakija nosiać ich imiony — raskazvaje mastak. — Ale hetyja partrety zafarboŭvajuć…» Duraść, darečy. Heta žyvaja narodnaja tvorčaść, dyj azdablaje asiarodździe.

Dream štampavaŭ na ścienach i vieršy biełaruskich kłasikaŭ: ad Kupały da Niaklajeva. «Paŭstańcie, rabskija natury!» i hetak dalej. Praŭda, «žyvuć» takija tvory niadoŭha, sistema baicca słova: «Z 20–30 vieršaŭ i bolej čym 30 „Słavutych synoŭ…“ vyžyli dziesiać pracaŭ».

Ciapier Dream zachopleny novym prajektam: jon sprabuje pieranieści na haradskija ścieny techniku vycinanki. «My pieranieśli na ścianu tvor majstrychi vycinanak — cikava vyhladaje», — kaža Dream.

Padzialiŭsia mastak i haračymi navinami stryt-artu. «Razmalavanaja elektryčka — heta nie biełarusy zrabili,

— zhadaŭ jon niadaŭni vypadak u Minsku, kali ŭnačy na vahonie źjaviŭsia ahromnisty nadpis Bunt. — Pryjechała hrupa rasijskich mastakoŭ».

Siońnia, kab mastactva pryciahvała, treba łomka šabłonu i chutkaść reakcyi na źmienlivy śviet:

«Nichto nie hladzić na płakaty, jakija zaklikajuć zachoŭvać čyściniu — a my robim alternatyŭnyja trafarety, što nazyvajecca, «pa žeści», — kaža Drym.

***

Konkurs «Unikalnaja Biełaruś. Novy styl»

Ładzić Street-art supolnaść Signal. Da ŭdziełu zaprašajucca vuličnyja mastaki i zvyčajnyja hramadzianie ź idejami. «U pracach treba adlustravać toje, što moža vyłučyć Biełaruś u sučasnym hłabalizavanym śviecie, pakazać tuju Biełaruś, u jakoj chacieli b žyć vy i vašyja siabry. Pažadana (ale nie abaviazkova), kab pracy i idei byli źviazanyja z historyjaj, kulturaj, tradycyjami Biełarusi», — pišuć arhanizatary.

Kantakty: signal.streetart@gmail.com, signalmag, signal_magazine.

Čytajcie taksama:

Kamientary da artykuła