DMK: Niezakonnych pastavak za miažu naftapraduktaŭ niama i być nie moža
Usie pastaŭki naftapraduktaŭ ź Biełarusi adbyvajucca ŭ adpaviednaści z padpisanymi z Rasijaj pahadnieńniami, zajaviŭ staršynia Dziaržaŭnaha mytnaha kamiteta Alaksandr Špileŭski 14 červienia ŭ Minsku ŭ adkaz na prośbu žurnalistaŭ prakamientavać niadaŭnija vykazvańni rasijskaha pasła Alaksandra Surykava.
«Nijakich niezakonnych pastavak za miažu niama i być nie moža. Aficyjna zajaŭlaju, što ŭsio, što ŭvachodzić i vychodzić z krainy, znachodzicca pad žorstkim kantrolem», — skazaŭ Špileŭski. Jon zaznačyŭ, što «pradstaŭniki rasijskaha boku, jakija znachodziacca ŭ Minsku, pretenzij nie vykazvali».
Jak zajaviŭ na minułym tydni pasoł RF u Minsku Alaksandr Surykaŭ, rasijski bok źviarnuŭ uvahu na toje, što impart rasijskich naftapraduktaŭ Biełaruśsiu ŭ apošnija hady ŭzros u razy, u tym liku ŭ 2012 hodzie — u čatyry razy. Kamientujučy infarmacyju pra toje, što Biełaruś zajmajecca reekspartam rasijskich naftapraduktaŭ pad vyhladam razbavicielaŭ i rastvaralnikaŭ z metaj paźbiehnuć vypłaty ekspartnaj pošliny ŭ rasijski biudžet, Surykaŭ skazaŭ:
«My razumiejem, što Biełaruś impartuje bolš, čym treba dla ŭnutranaha spažyvańnia. Zaŭvažyli, što ŭ spravazdačnaści Mytnaha sajuza źjavilisia rastvaralniki i razbavicieli, jakija nie abkładajucca pošlinami. Letaś ich było dva miljony ton».
Pavodle słoŭ Surykava, hetym pytańniem zajmajucca adpaviednyja ekanamičnyja struktury ŭ RF. «Chutčej za ŭsio, jano budzie abmiarkoŭvacca ź biełaruskim bokam, kab nie było parušeńniaŭ z reekspartam. Reekspartavać možna, ale, kali łaska, zapłacicie pošlinu», — padkreśliŭ pasoł.
U adpaviednaści ź dziejnymi pahadnieńniami Biełaruś u abmien na biaspošlinnuju naftu i naftapradukty abaviazana pieraličvać u rasijski biudžet pošliny ad ekspartu naftapraduktaŭ za miežy Mytnaha sajuza. Letaś Rasii ŭ vyhladzie naftavych pošlin było pieraličana bolš za 3 młrd. dołaraŭ.
Adnak pry eksparcie razbavicielaŭ i rastvaralnikaŭ usia vyručka zastajecca ŭ Biełarusi, pošliny ŭ biudžet RF biełaruski bok nie płacić.