U arhaniźmie štanhista Aŭdziejeva znajšli konski preparat

Spartoviec dyskvalifikavany za dopinh na 4 hady.

Biełaruski 30-hadovy štanhist Michaił Aŭdziejeŭ, jaki ŭ krasaviku staŭ bronzavym pryzioram čempijanatu Jeŭropy-2012 u vahavoj katehoryi da 105 kh, dyskvalifikavany na 4 hady za ŭžyvańnie dopinhu.

Jak infarmuje aficyjny sajt Mižnarodnaj fiederacyi ciažkaj atletyki,

termin dyskvalifikacyi Michaiła Aŭdziejeva praciahniecca ad 14 krasavika 2012 hoda da 14 krasavika 2016.

Stanoŭčy vynik dała uziataja na čempijanacie Jeŭropy ŭ tureckaj Antalji abaviazkovaja dopinh-proba, jakija biarucca va ŭsich pryzioraŭ spabornictvaŭ. Na pieršynstvie kantynienta ŭ Turcyi zbornaja Biełarusi vystupała nie najmacniejšym składam, i bronza Michaiła Aŭdziejeva pa sumie dvajaborstva — 395 kh (180 kh u ryŭku + 215 kh u šturšku) stała adzinaj miedalom našaj kamandy. Adnak paśla dyskvalifikacyi biełarusa bronzavaja ŭznaharoda piarojdzie da 23-hadovaha Siarhieja Tahirava z Ukrainy, jaki zaniaŭ 4-je miesca, adoleŭšy 390 kh (180 210).

U arhaniźmie Michaiła Aŭdziejeva byŭ znojdzieny bałdenon — sintetyčny steroidny injekcyjny preparat, vytvornaje mužčynskaha pałavoha harmona testasteronu. Šmat u čym padobny pa struktury da mietandrastenałonu. Užyvajecca ŭ vieterynaryi, dzie vykarystoŭvajecca dla karoŭ, koniej i sabak, a taksama ŭ bodzibiłdynhu. Cudoŭna naroščvaje myšačnuju masu i paskaraje sintetyčnyja pracesy, stymuluje vykid nyrkami erytrapaetynu, harmona, viadomaha jak JEPO i stymulujučaha pradukcyju čyrvonych kryvianych cielcaŭ (erytracytaŭ), jakija pieranosiać kisłarod va ŭsie tkanki i kletki arhanizma.

Jak pryznaŭsia hałoŭny trenier zbornaj Biełarusi pa ciažkaj atletycy Alaksandr Hančaroŭ, dla štaba našaj kamandy vynik dopinh-proby byŭ niečakanym, pakolki pierad adjezdam na čempijanat Jeŭropy ŭsio spartsmieny prajšli pravierku na najaŭnaść u arhaniźmie zabaronienych preparataŭ.

«Daśledavańnie prob, uziatych doma pierad čempijanatam Jeŭropy, pravodziłasia ŭ maskoŭskaj antydopinhavaj łabaratoryi. Tamu byli ŭpeŭnienyja, što na spabornictvy vyjechała „čystaja“ kamanda.

Ni lekar, ni trenier hety preparat spartsmienu nie davali. Jak zabaronienaje rečyva patrapiła ŭ arhanizm? Mahčyma, heta viedaje sam Aŭdziejeŭ, ale jon prymianieńnie dopinhu admaŭlaje.

Čatyrochhadovaja ž dyskvalifikacyja Michaiła Aŭdziejeva, jakomu ciapier užo 30, napeŭna aznačaje kančatak karjery spartsmiena.

Zastajecca dadać, što

Biełaruski ciažkaatletyčny sajuz z-za hetaha dopinh-skandału budzie aštrafavany na $ 5,5 tys.

U hetym hodzie stanoŭčaja dopinh-proba Michaiła Aŭdziejeva, jakoha, darečy, treniruje asabisty nastaŭnik alimpijskaha čempijona Andreja Aramnava Michaił Saładar, — pakul adziny prakoł biełaruskich ciažkaatletaŭ.

Bolš za inšych «vyznačylisia» štanhisty Afhanistana — try stanoŭčyja dopinh-testy. Dvojčy na ​​ŭžyvańni zabaronienych preparataŭ trapilisia ałbancy, pa razie — daminikaniec i marakaniec.

U 2011 hodzie biełaruskija štanhisty nie zaśviacilisia ŭ dopinhavaj chronicy ni razu, a ŭ 2010 hodzie było adrazu 4 vypadki prymianieńnia zabaronienych rečyvaŭ. I kali Andrej Aramnaŭ svaju paŭhadavuju dyskvalifikacyju adbyŭ užo da śniežnia 2010-ha, to Michaił Čarniak, Šamšat Tulajeva i Uładzimir Jakuta byli adłučanyja ad sportu da krasavika i červienia 2014 hoda.

Kamientary da artykuła