«Spraviadlivy śviet» idzie na vybary
Hramadzianskaja kampanija za «Spraviadlivyja vybary» maje namier vystavić na parłamienckich vybarach 23 vieraśnia adnu tysiaču pradstaŭnikoŭ u vybarčyja kamisii i dźvie tysiačy naziralnikaŭ.Pra heta paviedamiŭ sustaršynia kampanii, lidar Biełaruskaj partyi levych «Spraviadlivy śviet» Siarhiej Kalakin 20 červienia na
Jon adznačyŭ, što na parłamienckich vybarach buduć i inšyja kampanii kantrolu za ich praviadzieńnie. «U internecie budzie vieścisia kampanija pa fiksacyi faktaŭ parušeńniaŭ, pravaabaroncy buduć vieści manitorynh vybaraŭ. Naša ž meta — heta kampanija aktyŭnaha nazirańnia. My budziem nie tolki fiksavać parušeńni, ale i sprabavać paŭpłyvać na praktyku praviadzieńnia vybaraŭ», — padkreśliŭ Kalakin.
Palityk paviedamiŭ, što pieršy test na praviadzieńnie sumlennych vybaraŭ ułada ŭžo pravaliła. Pavodle jaho słoŭ, u sakaviku ŭ Pałatu pradstaŭnikoŭ i CVK byli nakiravanyja prapanovy, realizacyja jakich u vybarčym zakanadaŭstvie dazvolili b pravieści prazrystyja vybary. «Hetyja papraŭki datyčylisia pravoŭ naziralnikaŭ, padliku hałasoŭ. Na žal, ułady na našu inicyjatyvu adkazali admovaj», — skazaŭ Kalakin.
Nastupnym testam dla ŭłady, pavodle jaho słoŭ, stanie farmiravańnie vybarčych kamisij. «Pakul my nie razhladajem uładu jak pramoha sapiernika, jak bok, što nam supraćstaić. Ja zhodny z vykazvańniami Łukašenki pra nieabchodnaść pramoha hramadzianskaha kantrolu za vybarami.
Tamu siońnia my zaklikajem ułady da supracoŭnictva, kab pravieści vybary prazrysta, a pa ich vynikach nie pradjaŭlać adzin adnamu pretenzij. Viadoma, ułada moža i nie ŭklučyć našych pradstaŭnikoŭ u kamisii.U takim razie jana pravalić i druhi test», — skazaŭ palityk.
Kalakin paviedamiŭ, što ŭ kampanii «Za spraviadlivyja vybary» na respublikanskim uzroŭni ŭdzielničajuć 13 palityčnych partyj i hramadskich abjadnańniaŭ, a z ulikam rehijonaŭ — 27 arhanizacyj.