Miaśnikovič skazaŭ, što na situacyju ŭ Biełarusi ŭpłyvaje suśvietny kryzis

Prem'jer-ministr Michaił Miaśnikovič nie vyklučyŭ mahčymaha ŭpłyvu na biełaruskuju ekanomiku situacyi na suśvietnym finansava-ekanamičnym rynku.

«Kali hladzieć abjektyŭna, i pra heta my havaryli z prem'jer-ministrami Rasii i Kazachstana na forumie, jaki prachodziŭ u Sankt-Pieciarburhu 15 červienia, niehatyŭnyja pracesy, recesija, źnižeńnie pakupnickaha popytu nazirajucca i ŭ Jeŭropie, i ŭ Kitai. Zrazumieła, i my nie zastrachavanyja ad hetaha, bo ŭ nas adkrytaja ekanomika. Adnak my budziem imknucca, kab abjomy kampiensacyjnych mier dazvolili ŭsio ž vyjści na płanavaje zadańnie», — cytuje Miaśnikoviča pres-słužba ŭrada.

Pry hetym prem'jer-ministr upeŭnieny ŭ dasiahnieńni pryrostu VUP u 5,5% pa vynikach hetaha hoda.

«Zadańnie vyznačana — 5,5%. Kali nie budzie niejkich źniešnich akaličnaściaŭ, dumaju, što my spravimsia z pastaŭlenaj zadačaj», — miarkuje prem'jer-ministr.

Kiraŭnik urada taksama paviedamiŭ, što ŭ Biełarusi ŭ 2013 hodzie ź dziaržpadtrymkaj budzie pabudavana prykładna 3 młn. kv. m žylla. U cełym płanujecca ŭźvieści prykładna 6 młn. kv. m žylla. Zadača budzie vyrašacca, u tym liku za košt apieradžalnaha budaŭnictva abjektaŭ infrastruktury — daroh, sietki vodazabieśpiačeńnia i vodaadviadzieńnia, elektra- i ciepłazabieśpiačeńnia, što dazvolić bolš aktyŭna vieści budaŭnictva kamiercyjnaha i indyvidualnaha žylla. U prahnozie sacyjalna-ekanamičnaha raźvićcia i prajekcie biudžetu na 2013 hod, nad jakim ciapier pracuje ŭrad, «adna z surjoznych zadač — rost abjomaŭ žyllovaha budaŭnictva».

Miaśnikovič paviedamiŭ taksama, što nastaŭnikam u Biełarusi adpusknyja vypłaciać svoječasova i ŭ poŭnym abjomie.

Kamientary da artykuła