Biełaruś spyniła impart nafty ź Vieniesueły

Biełaruś z červienia spyniła impart nafty ź Vieniesueły. Pra heta ŭ Minsku 22 červienia žurnalistam paviedamiŭ pieršy vice-premjer Uładzimir Siamaška.

«Sioleta štomiesiac Biełaruś impartavała pa 160 tysiač ton vieniesuelskaj nafty. Ale z červienia my ŭžo nie atrymlivajem naftu ź Vieniesueły», — skazaŭ Siamaška.

Pavodle jaho słoŭ, «heta była siabroŭskaja dapamoha, i ŭ peŭny momant hetyja pastaŭki byli vyhadnyja». Pieršy vice-premjer adznačyŭ, što pastaŭki nafty ź Vieniesueły vyrašyli šerah prablem. «I kali b nie było hetych pastavak u 2010–2012 hadach, to, napeŭna, nie było b pahadnieńniaŭ ab adzinym rynku nafty i naftapraduktaŭ, padpisanych z Rasijaj i Kazachstanam letaś. Ja ŭ hetym pierakanany», — padkreśliŭ Siamaška.

Jon adznačyŭ, što dziejnyja naftavyja pahadnieńni z Rasijaj — «uzajemavyhadnyja, uzajemaznačnyja, majuć palityčnyja i ekanamičnyja mety». «Kanjunktura rynku takaja, što tańniej naftu kuplać u Rasii, tamu my pierastali kuplać naftu ŭ Vieniesuele», — skazaŭ Siamaška.

Razam z tym pieršy vice-premjer adznačyŭ, što «kali buduć uźnikać rynkavyja situacyi, kali zapatrabujecca da rasijskaj nafty atrymać, u pryvatnaści, azierbajdžanskuju naftu, to hetaje pytańnie vyrašycca vielmi prosta».

Kamientary da artykuła