Pa Talinie projduć biełaruskija «promni sonca»

Praciahvajecca aktyŭnaja padrychtoŭka da fiestyvalu «Namiotavy haradok biełaruskaj kultury». Fiestyval projdzie ŭ kiempinhavaj zonie paŭvostrava Pakry pobač z horadam Pałdyski.

Adkryćcio fiestyvalu adbudziecca 31 žniŭnia. Skončycca fiestyval 3 vieraśnia adkryćciom vystavy habielenaŭ biełaruskaj mastački Śviatłany Barankoŭskaj u zale Adździeła litaratury na zamiežnych movach Talinskaj centralnaj biblijateki.

Arhanizatary — Biełaruski kulturna-infarmacyjny centr u Estonii i biełaruskaja moładzievaja arhanizacyja MCHSS «Maładyja demakraty». Udzielničać u fiestyvali buduć hości ź Biełarusi, ź inšych krain Jeŭropy i žychary Estonii, jakich cikavić biełaruskaja kultura. Siarod vystupoŭcaŭ buduć muzyki i piśmieńniki, dziejačy kino i žurnalisty. Fiestyval budzie ŭjaŭlać saboj akt «narodnaj dypłamatyi» — pasłancy Biełarusi znajomiać Estoniju z sučasnym kulturnym žyćciom svajoj krainy.

Dniom 31 žniŭnia Talin čakaje niezvyčajnaja źjava. Vulicami staroha horada buduć špacyravać ludzi ŭ załatych skafandrach i płaščach. Hetaja kulturnaja akcyja źjaŭlajecca častkaj fiestyvalu i nosić nazvu «Promni sonca».

Frontmen adkryćcia fiestyvalu Pit Paŭłaŭ, lidar hurta NRM, kaža: «Arhanizatary fiestyvalu paviedamili mnie, što jon pakul prachodzić farmacie «čałaviek z hitaraj». Mnie hety farmat znajomy, tamu ja sadžusia ŭ mašynu i jedu da vas u Estoniju, jakuju ja vielmi lublu. Da hetaha ŭ Talinie ja pabyvaŭ z kancertam u pasolstvie Polščy. Zaraz ja budu śpiavać dla publiki na bierazie mora. Hetaja ideja mnie vielmi padabajecca. Nahadvaju ŭsim, što forma adzieńnia — załataja.

1 vieraśnia adbudziecca inšaja akcyja ŭ ramkach fiestyvalu — «Biełaruski viełaprabieh». Udzielniki na rovarach nakirujucca z Pałdyski ŭ bok Talina. Maršrut budzie pralahać pa malaŭničych miescach uźbiarežža Bałtyjskaha mora.

U niadzielu, 2 vieraśnia, udzielniki fiestyvalu nakirujucca ŭ Chielsinki. Tam budzie prachodzić pieršaja ŭ historyi biełaruskaj kultury ekskursija «Chielsinki Vasila Bykava». Biełaruski kłasik žyŭ u hetym horadzie z 1997, znachodziačysia ŭ emihracyi. Pravodzić ekskursiju budzie finski siabar Bykava — žychar Chielsinki.

Nadmahilny kamień Bykava ŭ Minsku — vałun z navakollaŭ Chielsinki. Heta znak pavahi pamiaci piśmieńnika ad municypaliteta finskaj stalicy.

Dałučycca da ŭdziełu ŭ fiestyvali moža kožny. Uznos u hanararnaj fond składaje 10 jeŭra. U arhanizataraŭ možna ŭziać u arendu pałatki i rovary. Padrabiaznaja infarmacyja — na staroncy fiestyvalu.

Kamientary da artykuła