Šviedy adkazali KDB: lepš niachaj Łukašenka pryjedzie da nas

dadaŭsia poŭny tekst lista, poŭnaha ironii

«My majem tolki adno patrabavańnie: kab vy pavodzili siabie nastolki vietliva, nakolki zmožacie, i nie pahražali katavańniami».

Siońnia Per Kromveł, Tomas Mazeci i Hanna Lina Frej sa Šviecyi — arhanizatary «miadźviedžaha desantu» ŭ Biełaruś 4 lipienia — adkazali na pozvy biełaruskaha KDB źjavicca ŭ Minsku ŭ 10-dzionny termin dla śledčych dziejańniaŭ. Per Kromveł, kiraŭnik šviedskaj kampanii Studio Total, jakaja arhanizavała «plušavy desant» u Biełaruś 4 lipienia, paćvierdziŭ, što jon i jahonyja kalehi atrymali pozvy ad KDB źjavicca ŭ Minsku dla śledčych dziejańniaŭ ŭ hetaj spravie.

"Pavažany Alaksandr Łukašenka!

Prajšoŭ miesiac z taho času, jak my lacieli nad Vašaj stalicaj, skidajučy plušavych miadźviedziaŭ, i tydzień ad našaha apošniaha lista da vas. My padumali, što nadyšoŭ čas źviazacca z vami jašče raz. Šmat čaho adbyłosia. Vy zvolnili dvuch vašych samych vysokapastaŭlenych hienierałaŭ, šmat kazali pra nas na biełaruskim telebačańni i navat zaprasili nas naviedać vaš KDB u Minsku.

Nas, nievialičkaje rekłamnaje ahienctva, ciešyć takaja ŭvaha z boku žyvoha dyktatara (asabliva kali mieć na ŭvazie, što sapraŭdnych dyktataraŭ zastałosia niašmat),

* Pa-pieršaje, u zaprašeńni ad KDB havorycca tolki, što my pavinny pryjechać u Minsk «u 10-dzionny termin», inakš nam pahražaje «dva hady papraŭčaj pracy». Tam nie skazana, čamu nas vyklikajuć. Naahuł, pahražać niekamu papraŭčaj pracaj, kali jon nie prymie vaša zaprašeńnie — heta błahi ton. Ale my razumiejem heta. Vy i vaš KDB — staramodnyja. Heta značyć, vy, jak sto hadoŭ tamu, vyklikajecie ludziej biez tłumačeńnia pryčynaŭ. Vy i karajecie ludziej biez tłumačeńnia pryčynaŭ. Ale na samaj spravie heta nie hałoŭnaja prablema, heta tolki zaŭvaha na budučyniu.

* Pa-druhoje, u nas jość pytańnie, dzie my možam sustrecca. My płanavali ŭ šviedskaj ambasadzie. Niejtralnaja terytoryja, dypłamatyčny imunitet i ŭsio takoje. Ale Vy ŭ kiepskim humory departavali našaha pasła i začynili ambasadu. Alaksandr — heta narmalna! U kožnaha moža być drenny dzień. Ale potym vy źmianili miesca sustrečy, pryznačyŭšy jaje ŭ štab-kvatery KDB, u «amierykancy», jak jaje nazyvajuć biełarusy.

My nie chočam, kab nas nasili na rukach, ale źmianić utulny sad ambasady na bietonny bunkier, dzie ŭžo stahodździe katavali ludziej, nie padajecca spraviadlivaj zamienaj.

* Pa-treciaje, isnuje pytańnie našaha imunitetu. Vašym adkazam na heta było toje, što nam budzie zabiaśpiečanaja takaja ž spraviadlivaść, ź jakoj KDB razhladaje spravy ŭsich padazravanych, śviedkaŭ i paciarpiełych. Ci možam my vykazać zdahadku, što tut prajaviłasia vaša pačućcie humaru?

Heta hučyć śmiešna z boku słužby, jakuju takija arhanizacyi jak Amnesty International ličać najbolš žorstkaj i karumpavanaj u Jeŭropie.

* Pa-čaćviortaje, i heta na samaj spravie surjozna, my atrymali niekalki pahroźlivych listoŭ i telefonnych zvankoŭ, byŭ chakierski napad na našu paštovuju sistemu, i ŭsie ściežki viaduć da KDB. Viadoma, vy budziecie dumać: «Što za prablema?».

Chiba heta nie zvyčajnaja pracedura — pahražać katavańniami tym, chto hańbić dyktatara? Ale tym nie mienš dla nas heta niešta novaje. U Šviecyi palicyja nie maje prava pahražać, zabivać abo katavać ludziej.

Ahułam kažučy, usie hetyja maleńkija prablemy prymusili nas stracić žadańnie pryjechać i naviedać vas. Tym nie mienš my adčuvajem siabie drenna, kali ludzi śmiajucca nad vami i vašaj supierdarahoj SPA. Dyk što ž nam rabić? I nas praśviatliła.

Čamu b vam nie pryjechać i nie naviedać nas?

Takim čynam Studio Total maje honar zaprasić dyktatara Alaksandra Łukašenku ŭ naš dom u Skone ŭ Šviecyi. My arhanizujem i apłacim pražyvańnie, charčavańnie, taksi i ŭsio takoje. My taksama, jak abiacali, raskažam usio, što vy chočacie viedać pra toje, jak padmanuć vašu darahuju sistemu SPA.

My majem tolki adno patrabavańnie: kab vy pavodzili siabie nastolki vietliva, nakolki zmožacie (nie pahražali katavańniami i tamu padobnym), i kab vy vyzvalili usich palityčnych viaźniaŭ u Biełarusi.

My taksama źviarnulisia ŭ šviedskaje MZS, kab jany prafinansavali avijakvitok dla vas. Ale jany nie schacieli ničoha abiacać. «Narmalna my tak nie robim», skazali jany. Ale čakajcie! A čamu b nam nie zabycca choć na hety raz, jak usio pracuje narmalna?

To bok, vy byli dyktataram ŭžo amal 20 hadoŭ, tak? I što heta vam pryniesła? Šmat pociskaŭ potnych ruk, ludskija naśmieški dy surjoznuju pierśpiektyvu skončyć, jak Kadafi, kali vy i dalej budzie pahražać usim i aryštoŭvać ŭsich, chto nia zhodny z vami.

Z najlepšymi pažadańniami Studio Total

PS. Źviarnicie ŭvahu — my nie vykarystoŭvali nijakich pahrozaŭ, nie pahražali kinuć vas u łahier, kali vy nie adkažacie ŭ 5-dzionny termin.

I heta niahledziačy na toje, što naša złačynstva palahaje adno ŭ skidańni miahkich miadźviedzikaŭ, u toj čas jak vašy miadźviedzi pryhniatajuć krainu ŭžo 20 hadoŭ.

* * *

Nahadajem, što KDB nakiravaŭ hramadzianam Šviecyi Peru Kromvełu, Tomasu Mazeci i Chańnie Linie Frej aficyjnyja pozvy ŭ suviazi sa śledstvam u spravie parušeńnia biełaruskaj pavietranaj miažy 4 lipienia. Pozvy pierakładzienyja na anhlijskuju movu i apublikavanyja na aficyjnym sajcie KDB U pozvach havorycca, što hetyja asoby pavinny źjavicca dla praviadzieńnia śledčych dziejańniaŭ u 10-dzionny termin. Pry sabie nieabchodna mieć pašpart abo inšaje paśviedčańnie asoby. Paznačanyja ŭ pozvach i sankcyi, jakija mohuć być užytyja suprać šviedskich hramadzianaŭ u vypadku ich niajaŭki. Zhodna z artykułam 402 Kryminalnaha Kodeksa Biełarusi, za heta im pahražaje pakarańnie štrafam abo papraŭčaja praca, abo pazbaŭleńnie voli da 6 miesiacaŭ.

7 žniŭnia KDB zajaviŭ, što zaviedziena i rasśledujecca kryminalnaja sprava pa prykmietach złačynstva, praduhledžanaha č.3 art.371 KK Respubliki Biełaruś pa fakcie niezakonnaha pierasiačeńnia 4 lipienia dziaržaŭnaj miažy Biełarusi paddanymi Karaleŭstva Šviecyi na lohkamatornym samalocie. Pa padazreńni ŭ dapamahańni ŭ ździajśnieńni pakazanaha złačynstva zatrymanyja hramadzianie Biełarusi 20-hadovy žurnalist Anton Surapin, jaki pieršym na svaim sajcie apublikavaŭ fatazdymki skinutych z samalota plušavych miadźviedziaŭ i 26-hadovy ryełtar Siarhiej Bašarymaŭ, jaki, jak miarkujecca, zdavaŭ kvateru šviedam u Minsku. Surapinu i Bašarymavu pradjaŭlenaje abvinavačvańnie pa č.6 art.16 (dapamahańnie ŭ ździajśnieńni złačynstva) i č.3 art. 371 (niezakonnaje pierasiačeńnie Dziaržaŭnaj miažy Biełarusi) KK, što karajecca źniavoleńniem da 7 hadoŭ.

Lohkamatorny samalot sa šviedskim ekipažam z supracoŭnikaŭ kampanii Studio Total ź plušavymi miškami na borcie pierasiek pavietranuju miažu Biełarusi ranicaj 4 lipienia. Jon pravioŭ u pavietranaj prastory krainy prykładna paŭtary hadziny, skinuŭšy nad Iviancom i ŭskrainaj Minska bolš čym 800 cacak z zapiskami ŭ padtrymku demakratyi ŭ Biełarusi.

Kamientary da artykuła