Aleś Bialacki naminavany na premiju Sacharava

Biełaruski pravaabaronca Aleś Bialacki, jaki zaraz znachodzicca ŭ źniavoleńni, naminavany na premiju Jeŭraparłamienta imia Sacharava «Za svabodu dumki». Śpis naminantaŭ raźmieščany na aficyjnym sajcie Jeŭraparłamienta.

Za vyłučeńnie Bialackaha na atrymańnie hetaj premii padpisalisia polski deputat Jacek Saryjuš-Volski, inicyjatar vyłučeńnia, i jašče 82 jeŭraparłamientary.

Akramia Bialackaha, u śpisie naminantaŭ — rasijski pank-hurt Pussy Riot, pravaabaronca z Pakistana Džosef Fransis, troje pravaabaroncaŭ z Ruandy Viktuar Inhabir, Deahracijas Mušaidzi i Biernar Ntahanda, a taksama advakat Nasryn Satude ź Irana i jašče adzin pradstaŭnik hetaj krainy, režysior Džafar Panai.

Premija imia Sacharava zasnavana Jeŭraparłamientam u 1988 hodzie. Jana prysudžajecca ludziam i arhanizacyjam, jakija pryśviačajuć svajo žyćcio i dziejnaść abaronie pravoŭ čałavieka i jaho svabodaŭ, pieradusim svabodzie słova. Naminantaŭ na premiju «Za svabodu dumki» vyłučajuć deputackija frakcyi Jeŭraparłamienta abo hrupy deputataŭ, jakija pavinny sabrać u padtrymku svajho kandydata nie mienš za 40 podpisaŭ.

Pradstaŭniki Biełarusi ŭžo atrymlivali premiju imia Sacharava: u 2004 hodzie premii było ŭdastojena hramadskaje abjadnańnie «Biełaruskaja asacyjacyja žurnalistaŭ», u 2006 hodzie — eks-kandydat u prezidenty Alaksandr Milinkievič.

Uručeńnie ciapierašniaj premii «Za svabodu dumki» adbudziecca 12 śniežnia.

Kamientary da artykuła