Miaśnikovič daručyŭ stvaryć vytvorčaść karamieli ŭ Žabincy

Prem'jer-ministr Michaił Miaśnikovič daručyŭ stvaryć vytvorčaść karamieli na Žabinkaŭskim cukrovym zavodzie.

«Pieralik pradukcyi, što vyrablajecca na našych cukrovych zavodach, dastatkova abmiežavany. Pastaŭlena zadača na praciahu najbližejšaha hoda stvaryć na zavodzie mahutnaści pa vytvorčaści karamieli», — skazaŭ prem'jer-ministr žurnalistam.

Miaśnikovič adznačyŭ, što siońnia Biełaruś impartuje karamiel u asnoŭnym z Ukrainy. Razam z tym «u krainie jość usie nieabchodnyja resursy dla stvareńnia ŭłasnaj vtvorčaści takoj pradukcyi».

«Zadača pa źnižeńni sabiekoštu, vydatkaŭ vychodzić na samy pieršy płan, bo ad hetaha zaležyć i efiektyŭnaść vytvorčaści, — padkreśliŭ jon. — Kali my nie budziem źnižać sabiekošt, kali nie budziem pracavać z vydatkami na pradmiet ich skaračeńnia, u nas niama pierśpiektyŭ. Tamu vału luboj canoj nie pavinna być. My pavinny rabić vysokakłasnyja pradukty z vysokaj hłybinioj pierapracoŭki i ź nizkim sabiekoštam. Tady ŭ nas budzie narmalny prybytak, jaki zabiaśpiečyć nie tolki prostaje, ale i pašyranaje ŭznaŭleńnie».

Prem'jer-ministr taksama zakranuŭ pastanovu № 841 ad 11 vieraśnia 2012 hoda, jakoj za kožnym členam urada zamacoŭvajucca pradpryjemstvy i inviestycyjnyja prajekty. «My nie stavim zadaču padmianić kiraŭnikoŭ, zabiaśpiečvać vykanańnie funkcyj dyrektarskaha korpusu, a budziem pracavać nad tym, kab zrušyć hetyja pradpryjemstvy ź miortvaj kropki dla taho, kab jany pracavali sapraŭdy efiektyŭna», — patłumačyŭ Miaśnikovič. Pavodle jaho słoŭ, siońnia ŭ niaprostych umovach pa roznych pryčynach znachodziacca mnohija pradpryjemstvy. «Treba im dapamahčy adpaviednym čynam, dla hetaha i nieabchodny praryŭnyja prajekty», — zajaviŭ jon.

Adkazvajučy na pytańnie ab pierśpiektyvach raźvićcia Baranavickaha vytvorčaha bavaŭnianaha abjadnańnia, jakoje Miaśnikovič kuryruje, jon adznačyŭ, što «pradpryjemstva znachodzica ŭ vielmi niaprostym stanoviščy, adnak situacyja nie bieznadziejnaja. Dziakujučy mieram, što prymajucca, ažyćciaŭlajecca strukturnaja pierabudova, raście rentabielnaść, pamianšajucca składskija zapasy». «U pradpryjemstva dobryja pierśpiektyvy», — upeŭnieny prem'jer-ministr.

Kamientary da artykuła