Tajbaksior Hurkoŭ u znak pratestu admoviŭsia ad miedala čempijanatu śvietu — videa
Niezadavoleny sudziejskim rašeńniem, Vital Hurkoŭ bajkatavaŭ cyrymoniju ŭznaharodžvańnia.
Vital Hurkoŭ.
U finalnym dvuboi čempijanatu śvietu pa tajskim boksie, što prajšoŭ u rasijskim Sankt-Pieciarburhu, sudździ sprečna addali pieramohu miascovamu bajcu, paviedamlaje «Jeŭraradyjo».
Heta rašeńnie vyklikała chvalu dyskusij. Pavodle praviłaŭ tajskaha boksu, dzie ceniacca ŭdary łokciami i klinč, na dumku mnohich, pieramoh biełarus Vital Hurkoŭ. Rasijanin nie hladzieŭsia miaškom, uziaŭ treci raŭnd i navat pierabiŭ našaha bajca nahami, ale takoha dla pieramohi ŭ hetym vidzie sportu zazvyčaj niedastatkova.
Vital Hurkoŭ, jaki ličycca bajcom vysakarodnym i intelihientnym, u znak pratestu admoviŭsia vychodzić na pjedestał i zabirać srebny miedal.
«Ja ŭčora paprasiŭ padać pratest. Tam lik 3:2 pa sudziejskich natatkach. Ale tam jašče niejkija kantrolnyja natatki. Jany taksama — u rasijski bok, — kaža trenier Vitala Dźmitryj Piasiecki. — Karaciej, akazałasia, što niama precedentu, kab padać pratest».
Dvuboj Hurkoŭ-Mahamiedaŭ pa sutnaści vyrašaŭ baraćbu za druhoje miesca ŭ kamandnym zaliku. Pieršaje miesca zaniała zbornaja Tajłanda. U paŭfinale, darečy, biełarus siensacyjna pieramoh suśvietnuju zorku prafiesijnaha tajskaha boksa Kiema. Zdavałasia b, prablemaŭ z Mahamiedavym być nie moža. Ale ŭ spravu, na dumku Dźmitryja Piasieckaha, umiašałasia spartovaja palityka.
«Jany ž chitra zrabili. Tam, naprykład, adzin z bakavych sudździaŭ byŭ Bałaš, — praciahvaje Dźmitryj Piasiecki. — Heta vienhr, i vielmi tałkovy sudździa. Ale jon užo try hady žyvie ŭ Maskvie i treniruje ŭ ich kłubie. Zrazumieła, što pry takim raskładzie jon budzie addavać u inšy bok.Zahadzia viedajučy, što moža być roŭny boj, padabrali adpaviednuju sudziejskuju bryhadu».
Apošnim časam, na dumku biełaruskich śpiecyjalistaŭ, našym davodzicca zmahacca nie tolki z mocnymi sapiernikami, jakich niaprosta nakaŭtavać, ale i z sudździami.
Tak było, naprykład, z baksioram Siarhiejem Karniejevym, jakomu nie addali pieramohu na Alimpijadzie ŭ Łondanie ŭ supraćstajańni z azierbajdžancam. Kanstancin Machańkoŭ, nastaŭnik Karniejeva, treniravaŭ i tajbaksiora Vitala Hurkova, jakomu staviŭ techniku ruk i vyvodziŭ na pik formy.
Kanstancin Machańkoŭ: «Z sudziejstvam było nie ŭsio dobra. Vital vyjhraŭ boj, ale addali ŭ inšy bok. Treba było hetaha i čakać. U Rasii z rasijaninam treba pieramahać bolš vidavočna. Kamientatar taksama vykazaŭsia, što pieramoh Hurkoŭ, ale narakać na sudziejskaje rašeńnie nie ŭziaŭsia».
Jeŭraradyjo: Vychodzić, što takoje ŭ supraćstajańni z bahatymi krainami budzie praciahvacca. Našych buduć i dalej zasudžvać u boksie i tajskim boksie …
Kanstancin Machańkoŭ: «Zaŭsiody tak było, ale kali ciabie heta nie tyčycca, ty dumaješ, što ŭsio dobra. Treba pisać pra heta, treba havaryć. Toje, u što pieraŭtvaryŭsia, naprykład, alimpijski boks, to ŭvohule niama čaho abmiarkoŭvać: na Hulniach u Łondanie było 24 pratesty, i tolki dva byli zadavolenyja. Treba rabić vysnovy i pracavać nad taktykaj. Apuskać ruki ci iści pad kramu pić piva — heta taksama nie vyjście ŭ takoj situacyi».
Na čempijanacie śvietu ŭ Sankt-Pieciarburhu biełarusy ŭsio ž zdabyli try załatyja miedali.Pieramoh jašče adzin zasłužany biełaruski bajec Andrej Kulebin (67 kh), jaki niečakana raspraviŭsia z topavym tajskim prafiesijanałam, a taksama Dźmitryj Valent (75 kh) i Dzianis Hančaronak (91 kh). Kali b pieramohu addali Hurkovu, to Biełaruś abyšła b Rasiju. A tak u nas treciaje ahulnakamandnaje miesca.