Łukašenka: «Budu rychtavać u pierajemniki samaha maleńkaha»
Alaksandar Łukašenka daŭ pres-kanferencyju dla kiraŭnikoŭ biełaruskich ŚMI. Jana prachodziła ŭ budynku Nacyjanalnaj biblijateki, na jaje było akredytavana 30 pradstaŭnikoŭ presy, pieravažna biełaruskaj dziaržaŭnaj. Sensacyj nie prahučała. Najbolšaj byŭ chiba ŭdzieł redaktaraŭ niekalkich niedziaržaŭnych ŚMI i mahčymaść dla ich zadać pytańni. Samaj zahadkavaj frazaj byŭ adkaz na pytańnie pra pierajemnika: «Što da pierajemnika, to budu rychtavać samaha maleńkaha, unikalny raście čałaviek».
Alaksandar Łukašenka daŭ pres-kanferencyju dla kiraŭnikoŭ biełaruskich ŚMI. Jana prachodziła ŭ budynku Nacyjanalnaj biblijateki, na jaje było akredytavana 30 pradstaŭnikoŭ presy, pieravažna biełaruskaj dziaržaŭnaj. Sensacyj nie prahučała. Najbolšaj byŭ chiba ŭdzieł redaktaraŭ niekalkich niedziaržaŭnych ŚMI i mahčymaść dla ich zadać pytańni. Samaj zahadkavaj frazaj byŭ adkaz na pytańnie pra pierajemnika: «Što da pierajemnika, to budu rychtavać samaha maleńkaha, unikalny raście čałaviek».
Napačatku A.Łukašenka adznačyŭ, što pa «peŭnych pryčynach» hetaja pres-kanferencyja admianiałasia, i skazaŭ, što «prezydent abaviazany sustrakacca z pradstaŭnikami presy». Jon pačaŭ pres-kanferencyju z zajavy, što biełaruskaja ekanomika pieraadoleła nastupstvy rostu cenaŭ na enerhanośbity. Dalej jon pierajšoŭ da napadak na apazycyju. Ź jahonych słovaŭ, biełaruskaje hramadztva pierajšło ŭ stadyju, kali «našu stabilnaść nichto nie złamaje».
Nijakich pryncypova novych zajavaŭ na pres-kanferencyi nie prahučała. A.Łukašenka paćvierdziŭ palityčnyja i kulturnyja pazycyi, jakija hučali raniej. Siurpryzam stała tolki zajava, što A.Łukašenku prapanoŭvali kupić 25% akcyjaŭ «Biełaruskaliju», ale jon nie pahadziŭsia na heta. A zahadkaj vykazvańnie pra pierajemnika: «Što da pierajemnika, to budu rychtavać samaha maleńkaha, unikalny raście čałaviek».
Na pytańnie redaktara «Narodnaja voli» ab viartańni niezaležnaj presy ŭ raspaŭsiud, A.Łukašenka faktyčna syšoŭ ad adkazu. Prahučali supiarečlivyja i doŭhija vykazvańni, paśla čaho jon ustupiŭ u doŭhi raźniavoleny dyjaloh ź Josifam Siaredzičam.
Ahulny ton razmovy byŭ spakojny, raspružany, u čymści navat prymirenčy — u paraŭnańni ź niekatorymi raniejšymi vystupami. Tak, nibyta A.Łukašenka stvaraje sabie novy imidž.
Prapanujem pierakaz asnoŭnych vykazvańniaŭ A.Łukašenki.
Pra palityčnuju elitu i ekanamičnuju sytuacyju
Ja adčuvaju siabie kamfortna va ŭładzie, moža ja i nie zusim adekvatna ŭsprymaju pracesy ŭ krainie, ale ja viedaju, kudy musić iści kraina, kab raźvivacca. Ja bolš bajaŭsia za ekanomiku, a nie za palityčnuju stabilnaść, jaje ŭžo nichto nie złomić. Ale i ŭ ekanomicy my ŭsio raźličyli, bo viedali, što budzie taki ŭdar pa enerhapastaŭkach. My viedali, kolki daviadziecca zapłacić za haz, a kolki za naftu... Ja taksama pieražyvaju za bankaŭskuju systemu, šmat chto zabiraŭ hrošy z bankaŭ, ale abvału nie adbyłosia. Nas vyratavała palityka nakapleńnia «załatoha» rezervu. Na valutnym rynku sioleta my majem plus, ciapier u nas lepšy pakaźnik, čym u dobrym minułym hodzie. Pra heta chutka pavierać navat apazycyjnyja ŚMI... Naš biudžet pa dachodach budzie pieravykanany. Heta — pieramoha. My ciapier nie adčuvajem niedachopu nafty na našych naftaapracoŭčych zavodach. Naša ekanomika vystaić, my zrobim toje, što zaplanavali.
Pra adnosiny z susiedziami
Naša zamiežnaja palityka šmatvektarnaja. My musim mieć dobryja adnosiny z usimi susiedziami, a najpierš z Rasiejaj. Nam nie ŭdałosia naładzić adnosiny z Zachadam, tak, jak z Rasiejaj ci krainami Poŭdnia. Ale ja nie źjaŭlajusia vinoj hetaha. My viedajem, što choča ad nas Zachad. My pastajanna syhnalizujem Zachadu pra toje, što chočam ustanavić ź im dobryja adnosiny... Biełaruskaja ekanomika padšturchoŭvaje mieć dobryja adnosiny z Zachadam. Tam ahramadnyja našy intaresy. Adnak my nie pacierpim, kali Eŭrasajuz prapanoŭvaje nam niejki śpis mieraŭ ad biełaruskich uładaŭ, jaki dyktuje im apazycyja. Panukać nami Eŭropie nie dazvolim...
Zachad kaža, što Dzień Voli prajšoŭ narmalna, ale byli nie zusim adpaviednyja momanty... Dyk u ich na Zachadzie razhaniajuć vuličnyja akcyi... Ich 400 čałaviek u tak zvanaj apazycyi było, tak i zastałosia — heta bajeviki. Usiaho apazycyi paŭtary tysiačy sa spačuvajučymi. I my im nie dazvolim hadzić u centry horadu... My hatovyja da dyjalohu, ale biez usialakich ultymatymaŭ. Kali nie — to nie. U nas jość inšyja partnery.
Pra niezaležnaść
Ja pradbačyŭ niaprosty los dla biełaruskaha suverenitetu. Niama absalutna niezaležnych dziaržavaŭ, navat ZŠA u niečym zaležyć ad inšych dziaržavaŭ. Naša dziaržava pa mnohich pytańniach zaležyć siońnia. Ale navat niezaležnyja hazety nie paprakajuć mianie, što ja zdaju suverenitet. My nikoli nia budziem rehijonam Rasiei. Biełaruś nie pradaść za ceny na naftu i haz suverenitet krainy. Hod nazad Pucin skazaŭ, što biełaruskaja biada ŭ tym, što Biełaruś realna niezaležnaja. Naša niezaležnaść vytrymała ŭdary i z boku Rasiei. Razam z tym nam treba razumieć, što biełaruskaja niezaležnaść budzie doraha kaštavać.
Pra prezydenckija ambicyi ŭ Rasiei
U Rasiei niama narmatyŭnaj bazy, kab ja staŭ tam prezydentam. Tym bolš ja maju takuju samuju pasadu ŭ Biełarusi. Heta ciažkaja rucinnaja praca. Ja aproč pracy ničoha nia maju. Ja nie ŭjaŭlaju, jak Rasiejaj možna kiravać, kali nie adčuvać, što robicca ŭ hetaj ahramadnaj krainie, u Biełarusi ja heta adčuvaju. Ja maju tyja ž katedžy i samaloty, što i prezydent Rasiei. Nia treba dumać, što ja imknusia stać prezydentam Rasiei. Ja prosta chaču, kab mianie i našu krainu pavažali ŭ Rasiei... Razam z tym my nikoli nie prapuścim praz našu terytoryju tanki ŭ bok Rasiei... Takija razmovy viaducca ŭ Rasiei praz papularnaść tam biełaruskaha pytańnia... Našy sympatyi ŭ rasiejskaj palitycy viadomyja, my ich nie chavajem.
Pra sajuz Biełarusi i Rasiei
Sajuz vielmi istotna zaležyć ad subjektyŭnych faktaraŭ. Sajuz byŭ vyhadny i nam, i rasiejcam. Adnak u Rasiei pryjšli novyja ludzi da ŭłady i pačalisia prablemy. Ja nie razumieju, čaho baicca ahramadnaja Rasieja? Našaha miasa, cukru, małaka? My ž heta ŭsio pradadzim u Niamieččynie. My abydziemsia i biez rasiejskaha rynku, vytrymajem heta. My musili pryniać sajuznuju kanstytucyju, ale nam prapanavali pierajści na rasiejskuju valutu, ale ž heta častkovaja stratu suverenitetu. My nie pajšli na heta. Paśla rasiejcy pačali vychodzić z roznych sajuznych pahadnieńniaŭ. Nam heta nia vyhadna, toje nia vyhadna. Heta rabiŭ nie rasiejski narod, a jaho kiraŭniki. Ni ja, ni naša kraina nia stanie maryjanetkami ŭ niečych rukach. My chočam česnych i prazrystych adnosinaŭ, tamu praces sajuznaha budaŭnictva čarhovy raz zamarožany. Hetyja prablemy mohuć być vyrašanyja ciaham 10 dzion. Mnie nia chočacca razvalvać hety sajuz, bo ja jaho inicyjavaŭ. Jon dla mianie vielmi važny. Treba prybirać zavały, što skłalisia ŭ dačynieńniach z Rasiejaj. Biez Sajuzu z Rasiejaj nam niamožna. My nie pavinny sychodzić ad Rasiei. Nas pichajuć da hetaha sajuzu našy narody i historyja. Sajuz z Rasiei my pabudujem, kali nia my, to tyja, chto pryjdzie paśla nas.
Pra pierajemnika
«U blizkaj budučyni prezydentam Biełarusi budzie Alaksandar Łukašenka. Ja klanusia vam, što ŭ siamji my nie razmaŭlajem na hetuju temu. Kali vy kažacie pra Viktara, to jon siońnia i zaŭtra budzie słabiejšy za mianie. Što da pierajemnika, to budu rychtavać samaha maleńkaha, unikalny raście čałaviek. Maje dzieci ź liškam najelisia majho prezydenctva. Nichto ź ich nia budzie prezydentam».
Pra prablemu Čarnobylu
Planuju znoŭ pajechać pa zaražanych radyjacyjaj rehijonach. Chaču pahladzieć, jak raźvivajecca tam sytuacyja. Hamielčuki i mahiloŭcy razumiejuć, što, kali prezydent ź imi, to ŭsio narmalna». Łukašenka zajaviŭ taksama, što nie źbirajecca adznačać 26 krasavika razam z apazycyjaj, bo apazycyja moža tolki «taptać asfalt u stalicy». Ja nikoli nie admaŭlaŭsia ad mižnarodnaj dapamohi i prapanoŭvaŭ apazycyi razam vyrašać čarnobylskija prablemy. Ale ja nie viedaju, što jany buduć rabić pry hetym. Taptać asfalt u Miensku, idučy «Čarnobylskim šlacham»? Albo jany na niešta jašče zdolnyja?
Pavodle kiraŭnika krainy, «kali razam, to treba jechać u čarnobylskija rehijony z kankretnymi spravami i nie abaviazkova chadzić śledam za prezydentam. Moža častku hrošaj zachodnich adšpilić, paprasić Zachad nakiravać hrošy na čarnobylskija prablemy, a nie na demakratyju i svabodu, jak jany patrabujuć».
Pra AES
Tolki durań moža być suprać pabudovy AES. My faktyčna ab`iaŭlajem tender na budaŭnictva stancyi. Rasiejcy naŭprost kažuć – až da razryvu adnosinaŭ, kali vy nie budziecie z nami mieć spravu. Atamnuju stancyju my pabudujem na vyhadnych dla Biełarusi ŭmovach, u supracoŭnictvie z tymi, chto nie vystaŭlaje nam palityčnych umovaŭ.
Pra niezaležnuju presu
Znajdzicie ŭ śviecie takoha durnia, jaki zhodzicca drukavać i raspaŭsiudžvać takija hazety. U niezaležnaj presie na mianie niasuć taki brud, što navat «Moskovskomu komsomolcu» nia śniłasia. Ja nie zabaraniaju našym drukarniam drukavać niezaležnyja hazety, ale ž jany paŭsiul parušajuć biełaruski zakon. Tak, adna hazeta piša, što Łukašenka ŭ zapoi. Našto plavuzhać na maich synoŭ, jany nia horšyja za synoŭ apazycyjaneraŭ. Idzi i zaklučajcie z drukarniami i sajuzdrukami dahavory, ale kali parušycie zakon, to vas znoŭ vykinuć.
Pra rehistracyju ŚMI
Lahčej zarehistravać vydańnie nia budzie. Kali novaje vydańnie zachoča zarehistravać Jakubovič, prablem nia budzie, ale ŭ inšych vypadkach my budziem šmat dumać. Telebačańnie i radyjo nia budzie pryvatyzavacca. Raspaŭsiudžvać niezaležnyja hazety my nia budziem, ale niachaj pišuć i sami pradajuć. A kab puskać kahości na radyjo, patrebnyja vielmi surjoznyja abaviazacielstvy ź jahonaha boku.
Pra sielskuju haspadarku
Bolš, čym siońnia, dziaržava dla vioski rabić užo nia budzie, bo naradžajecca ŭtrymanstva... Mianie krytykujuć, što ŭ Aleksandryi Łukašenka stvaryŭ niejki ahraharadok. Heta Prakapovič rabiŭ, ja jaho za heta i krytykavaŭ, ale ŭ toj ža Aleksandryi źjaviłasia rentabelnaść sielskaj haspadarki. I tam pracujuć byłyja prapojcy, a mohuć ža nia pić, i dajarki tam atrymlivajuć pa 600-800 dalaraŭ... Ciažka pravieryć, kolki chto nadaiŭ i namałaciŭ, ad hetaha źjaŭlajucca prypiski. Rabicie, što chočacie, ale my kupim stolki i stolki ŭ vas ziernia, mienš nielha.
Pra ekanamičnyja vykliki
U adkaz na pytańnie redaktara hazety «Biełorusy i rynok» Viačasłava Chadasoŭskaha: My nie byli hatovyja da padvyšeńnia cenaŭ na enerhanośbity, ale my ź imi spravilisia. Kali ŭrad nia zmoža pradavać biełaruski tavar, to hetaha ŭradu nia budzie. Ja adkryta skazaŭ pra heta Sidorskamu. Ekanomika nia musić być palityzavanaj, u hetym pytańni my hatovyja pracavać i z apazycyjanerami. Nia treba čakać kryzisu i abvału, a treba prapanoŭvać svaje šlachi vyrašeńnia. U nas nia budzie abvału ekanomiki, mnie prapanoŭvali heta va ŭradzie, ale ja nie pahadziŭsia na heta... My pastupova pryjdziem da taho, da čaho musim pryjści. Mnie prapanoŭvajuć pradać pakiet akcyjaŭ mabilnych kampanijaŭ «Biestu» i Velcom, ja dumaju nad hetym, bo heta budzie vyhadna dziaržavie, ale pradavać «Biełaruśkalij» i BMZ ja nia budu. Choć mnie i prapanoŭvali pradać 25% «Biełaruśkaliju». Voś jakraz učora. Prapanoŭvali takija hrošy, što strašna nazvać, namnoha bolš, čym «Hazprom» prapanoŭvaŭ... My budziem pryvatyzoŭvać tolki tyja pradpryjemstvy, jakim nie dajom rady...
Pra ŭstupleńnie ŭ Suśvietnuju handlovuju arhanizacyju
Pa prapanovie Łukašenki pra heta raskazvaje vice-premjer Andrej Kabiakoŭ: «Praviły hetaj arhanizacyi dyktujuć mocnyja hetaha śvietu. Pad pytańniem samo isnavańnie SHA. U mnohich sektarach Biełaruś užo pracuje pa normach SHA, adnak praces ustupleńnia niaprosty. Prezydent nikoli nia staviŭ za samametu ŭstupleńnie ŭ SHA».
Łukašenka: «Kali ŭvieś śviet ustupaje ŭ SHA, a my — nie, to ja nia baču nijakaj prablemy. My ž usio adno budziem pracavać pa ichnych praviłach».
Pra biaśpieku na darohach
«Ja zajmajusia hetaj prablemaj. U nas usie kiroŭcami stanoviacca za try miesiacy, a kali spadnica karaciejšaja, to i jašče chutčej. My niesurjozna stavimsia da hetaj prablemy».