Biełaruskim aptekam niavyhadna pradavać ajčynnyja leki

20.09.2012 / 14:50

Biełaruskim aptekam niavyhadna pradavać ajčynnyja leki. Pra heta zajaviŭ namieśnik ministra achovy zdaroŭja — dyrektar departamienta farmaceŭtyčnaj pramysłovaści Hienadź Hadavalnikaŭ 20 vieraśnia na sieminary ŭ Minsku.

Pavodle jaho słoŭ, na adnoj ź niadaŭnich narad pradstaŭniki aptečnaj haliny adkryta zajavili, što prodaž biełaruskich lekaŭ nie daje im zarablać hrošy i atrymlivać žadany ekanamičny efiekt: impartnyja leki prykładna ŭ čatyry razy daražejšyja za biełaruskija. Tamu ŭ mnohich pryvatnych aptekach biełaruskich lekaŭ niašmat. Usiaho, pavodle źviestak Biełstata, dola biełaruskich lekavych srodkaŭ na ajčynnym rynku składaje 36,7%. Pry hetym u niedziaržaŭnych aptekach ich dola tolki 12%.

Jak adznačyŭ Hadavalnikaŭ, časta rabotniki aptek admaŭlajuć pakupnikoŭ brać biełaruskija leki.

«Vielmi kryŭdna, kali prafiesijanały-pravizary zajaŭlajuć: vy možacie brać biełaruskija leki, ale jany kiepskija, jany nie lečać», — skazaŭ pradstaŭnik Ministerstva achovy zdaroŭja. Razam z tym, pavodle jaho słoŭ, «usie leki adnolkavyja». Usie farmaceŭtyčnyja zavody śvietu, u tym liku amierykanskija, pracujuć na abstalavańni, jakoje vypuskajecca ŭ Italii, Hiermanii, Kitai. Usie zavody biaruć substancyju ŭ Kitai, na adnym i tym ža zavodzie, z adnoj i toj ža nazvaj. Usie krainy vykarystoŭvajuć jeŭrapiejskuju farmakapieju, u jakoj jość standartnyja patrabavańni da jakaści, śćviardžaje namieśnik ministra.

Jon padkreśliŭ, što ŭ pacyjenta pavinna być prava vybaru: u asartymiencie aptek pavinny prysutničać jak zamiežnyja, tak i ajčynnyja preparaty; infarmacyja, jakaja davodzicca da pacyjenta ŭ momant vodpusku lekaŭ abo ich vybaru, pavinna być abjektyŭnaj.

Čytajcie taksama:

Kamientary da artykuła