Radyjo Vatykana: Nuncyj bačyŭ Bialackaha, Statkieviča, Daškieviča
i jašče čatyroch palitviaźniaŭ «na znak pavahi da ŭniviersalnaha maralnaha aŭtarytetu Śviatoha Ajca».
Apostalski nuncyj naviedaŭ u turmie Paŭła Sieviarynca i pieradaŭ praź jaho vitańni inšym palitviaźniam.Hetaja viestka dała nadzieju, što Katalickaja carkva stała pasiarednicaj miž uładami Biełarusi i palitviaźniami. Heta, jość spadzieŭ, moža pryvieści da vyzvaleńnia viaźniaŭ sumleńnia.
Na sajcie radyjo Vatykana siońnia źjaviłasia nastupnaje paviedamleńnie:«Na znak pavahi da ŭniviersalnaha maralnaha aŭtarytetu Śviatoha Ajca i humanitarnych namahańniaŭ Śviatoha Pasadu, u ramkach dvuchbakovych dypłamatyčnych adnosin, papskamu pradstaŭniku ŭ Minsku,
arcybiskupu Kłaŭdyjo Hudžeroci, było dazvolena naviedać niekatorych źniavolenych u turmach Biełarusi. Havorka idzie pra Kavalenku, Syramołatava, Statkieviča, Bialackaha, Daškieviča, Łobava i Sieviarynca. Apostalski nuncyj sustreŭsia z kožnym z hetych źniavolenych u miescach pazbaŭleńnia voli, daviedaŭsia pra ichny stan i vysłuchaŭ ich. Jon pieradaŭ im malitvy Śviatoha Ajca i katalikoŭ za ich i ich siemji».
Jak viadoma, palitviazień Siarhiej Kavalenka vyjšaŭ na svabodu ŭčora, praz peŭny čas paśla padpisańnia prašeńnia ab pamiłavańni. Viadoma, što takoje prašeńnie taksama napisaŭ anarchist Syramołataŭ. Mienavita jany ŭvachodziać u śpis naviedanych apostalskim nuncyjem.
Paśla vychadu na svabodu Kavalenki ŭsiaho ŭ turmach Biełarusi ciapier zastajecca 13 palitźniavolenych. Jašče značnaja hrupa ludziej majuć umoŭnyja terminy abo abmiežavany ŭ pravach paśla źniavoleńnia.
Papa Bieniedykt XVI prymaŭ Alaksandra Łukašenku ŭ 2009 hodzie ŭ Vatykanie. Heta byŭ pieršy zachodni vizit kiraŭnika Biełarusi paśla doŭhaha pieryjadu ihnaravańnia jaho jeŭrapiejskaj supolnaściu za parušeńni pravoŭ čałavieka i normaŭ prystojnaści.
«Kamientavać hetaje paviedamleńnie radyjo Vatykana pieravyšaje maje paŭnamoctvy, a nuncyja ŭ krainie niama», — adkazaŭ «Našaj Nivie» supracoŭnik apostalskaj nuncyjatury.