«Bačycie, dyktatura taksama dobraja»: Łukašenka paabiacaŭ vypuścić Irynu Chalip za miažu
I nie vypuścili.
U brytanskaj štodzionnaj haziecie The Evening Standard 17 kastryčnika apublikavany frahmient intervju Alaksandra Łukašenki ad 9 kastryčnika, u jakim kiraŭnik dziaržavy abiacaje vyzvalić žurnalistku Irynu Chalip.
Karespandent pacikaviŭsia ŭ Łukašenki, čamu Chalip nie moža vyjechać, naprykład, na lačeńnie ŭ Maskvu, i kaža, što hatovy asabista za jaje paručycca.
U adkaz na heta Łukašenka zajaviŭ: «A što, jana ŭ nas? Ja dumaŭ, jana ŭ Maskvie.Adpraŭcie siońnia ž ź viačernim kaniom z Ženiam (žurnalist Jaŭhien Lebiedzieŭ) Chalip. Zabirajcie i naohuł jaje bolš siudy nie pryvoźcie. Chaj jedzie.
Ja pieršy raz čuju, što jana nie moža vyjechać u Maskvu padlačycca. Ja pra hetaha čałavieka naohuł ničoha nie mahu havaryć. Vy chočacie jaje ŭ Maskvu vieźci? Viazicie».
Žurnalist nahadaŭ, što Chalip znachodzicca pad padpiskaj ab niavyjeździe, i Łukašenka źviarnuŭsia da kahości sa svaich pamočnikaŭ z prośbaj udakładnić detali pa spravie Chalip. «Udakładnicie, chto naohuł hetym zajmajecca ź milicyi ci chto tam, i mnie skažacie, — havoryć Łukašenka. — I my vam arhanizujem. Dyj nie ŭ Chalip sprava. Ja ŭžo pryniaŭ rašeńnie. Bačycie, dyktatura taksama dobraja. Nivodny prezident adrazu nie pryniaŭ by rašeńnie, a ja pryniaŭ».
«Jakoje rašeńnie?» — udakładniaje Lebiedzieŭ. Na što Łukašenka jamu adkazvaje: «Nu, Chalip vy siońnia pavieziacie zamiest žonki damoŭ ci kudy tam».
U intervju rasijskaj «Novoj hazietie», ułasnym karespandentam jakoj u Minsku pracuje Chalip, sama Iryna raskazała, što 15 kastryčnika jana pryjšła adznačacca ŭ milicyi i pacikaviłasia, ci sapraŭdy moža pajechać u Maskvu.
«U milicyi paśmiajalisia i skazali, što kali ja pasprabuju pajechać za miažu, mianie adrazu abvieściać u vyšuk i viernuć u Minsk u naručnikach, — skazała Chalip.— Łukašenka nie zacikaŭleny ŭ maim vyzvaleńni. Hetym letam mianie pavinny byli amnistavać. Maje inśpiektary z HUUS užo padrychtavali dakumienty dla majoj amnistyi, my ź imi žartavali, što chutka rasstaniemsia. Amnistyju padpisała vierchniaja pałata parłamienta, nižniaja, i kali dla vyzvaleńnia zastavałasia atrymać tolki podpis prezidenta, mnie abviaścili, što jurydyčna ja nie maju prava na amnistyju».
Chalip taksama dadała: «Ja dobra razumieju žadańnie Łukašenki pakrasavacca pierad žurnalistami. Jon vielmi lubić pryhožyja žesty. Ale žurnalisty źjazdžajuć, a zek zastajecca siadzieć».
***
Nahadajem, u mai 2011 hoda Iryna Chalip była pryznana vinavataj va ŭdziele ŭ masavych biesparadkach paśla vybaraŭ 19 śniežnia 2010 hoda i asudžana na dva hady pazbaŭleńnia voli z adterminoŭkaj vykanańnia prysudu na dva hady. Jana nie maje prava pakidać Minsk, abaviazana kožny tydzień adznačacca ŭ milicyi i być doma paśla 22.00. Adterminoŭka zaviaršajecca 20 lipienia nastupnaha hoda, paśla čaho sprava Chalip budzie ŭ druhi raz razhledžana ŭ sudzie, jaki vyrašyć, vyzvalić jaje, adpravić u turmu ci pakinuć u tym ža statusie jašče na niejki termin.