Labiedźka prosić padatkovuju i Hienprakuraturu adreahavać na vykazvańni Łukašenki rasijskim ŚMI
I pravieryć, ci spłaciŭ Łukašenka padatak z atrymanaha «Majbacha».
Lidar Abjadnanaj hramadzianskaj partyi Anatol Labiedźka prosić padatkovuju inśpiekcyju Minska i Hienieralnuju prakuraturu adreahavać na vykazvańni Alaksandra Łukašenki na pres-kanfierencyi rasijskim ŚMI 16 kastryčnika.
Pavodle jaho słoŭ,
padatkovuju inśpiekcyju jon zaklikaje adreahavać na zajavy Łukašenki pa fakcie dareńnia jamu hramadzianinam zamiežnaj dziaržavy aŭtamabila "Majbach".
"Razmova idzie pra atrymańnie dachodu zvonku, a značyć, jaho atrymalnik, hramadzianin Łukašenka, pa dziejnym zakanadaŭstvie abaviazany vypłacić padatak. Ja sumniavajusia, što heta zroblena, tamu paličyŭ patrebnym źviarnucca ŭ padatkovuju inśpiekcyju pa Minsku", — skazaŭ lidar AHP.
Da taho ž Labiedźka sprabuje vyśvietlić, kali mienavita kiraŭniku dziaržavy padaravali "Majbach".
"Nielha vyklučać, što fakt dareńnia mieŭ miesca da śniežnia 2010 hoda, tady ŭźnikaje pytańnie: a ci ŭkazana hetaja majomaść u dekłaracyi ab dachodach kandydata ŭ prezidenty Alaksandra Łukašenki?Ničoha asabistaha, ale, kali ad mianie patrabujuć dekłaracyju za 17 hadoŭ, to čamu nichto nie reahuje na fakt, ad jakoha jaŭna patychaje karupcyjnym ducham. "Majbach" — heta nie butelka šatłandskaha viski i nie fłakon francuzskaj parfumy. Tut naohuł jość pole dla dziejnaści nie tolki padatkovaj inśpiekcyi, ale i supracoŭnikaŭ ministra ŭnutranych spraŭ", — skazaŭ Labiedźka.
Taksama lidar AHP padrychtavaŭ zvarot u Hienieralnuju prakuraturu krainy, jon nastojliva rekamienduje Hienprakuroru Kaniuku raspačać kryminalnuju spravu pa fakcie sproby dać chabar słužbovaj asobie ŭ asabliva bujnym pamiery.
"Toje, što ŭčora ahučyŭ Alaksandr Łukašenka datyčna chabaru ŭ 5 miljardaŭ dołaraŭ za pryvatyzacyju "Biełaruśkalija", jość ništo inšaje, jak kryminalnaje złačynstva", — ličyć Labiedźka. Hetaja sproba, pavodle jaho słoŭ, pavinna być nieadkładna rasśledavana, i "pasiarednik Miša" pavinien znachodzicca ŭ turmie "na miescy Bialackaha". "Kali hetaha nie adbudziecca siońnia, to zaŭtra jon pryjdzie ŭ kabiniety ŭłady z čamadanam, dzie nie 5, a 10 miljardaŭ dołaraŭ.
Kali pravaachoŭnyja orhany nie adreahujuć na takoha rodu publičnyja zajavy, značyć, pačałasia "siejfavaja pryvatyzacyja" abo paprostu masavy, karupcyjny rasprodaž ułasnaści krainy", —pierakanany lidar AHP.