Škarpetki pa pošcie, partał videareceptaŭ, abo Jak zarabić u internecie
Pakazalnyja historyi internet-prajektaŭ na roznych stadyjach raźvićcia.
Chutka maładyja biełarusy ŭžo ŭ dziciačym sadku buduć šeryć dadatki z Google play i App store — paśla abaviazkovaj mannaj kašy, viadoma.Darosłyja biełarusy zbolšaha viedajuć pra «nieabmiežavanyja mahčymaści veb-pavucińnia», adnak dalej za słovy sprava zachodzić redka. My abrali try pakazalnyja historyi internet-prajektaŭ na roznych stadyjach raźvićcia.
Stas Bryl, sacyjalny pašukovik, «VierniMomient»
— Adnojčy ja ŭbačyŭ pa NTV siužet pra maładuju paru, jakaja znajšła adzin adnaho praz sajt čyhunki Hiermanii — jany abmianialisia pozirkami padčas vandroŭki, adnak nie paśpieli paznajomicca.Ja vyrašyŭ vykarystać hetuju ideju i stvaryć adpaviedny servis. U pošukach dapamohi ja źviarnuŭsia da Valika, ź jakim my razam vučylisia ŭ apošnim kłasie škoły. Praz try miesiacy raspracoŭki, u žniŭni 2011 hoda, my zapuścili sajt «VierniMomient». U nas syšło kala Br 500 tys. na pakupku damiena i chostynh, pryblizna $ 20 na rekłamu «Vkontaktie».
Užo praz tydzień isnavańnia nam napisali z maskoŭskaj Akademii prajektaŭ Farminers i zaprasili na kruhły stoł, dzie za adnu chvilinu my pavinny byli prezientavać naš prajekt. Pa vynikach my ŭvajšli ŭ top-15 adabranych — z 900 zajavak. Nam vydzielili inviestycyi dla dapracoŭki sajta, i praz 20 dzion my pierajechali ŭ Maskvu. Što datyčyć funkcyjanalnaści «VierniMomient» — ja nie viedaju, jak časta ludzi znachodziać adzin adnaho z dapamohaj sajta, adnak pastupała vielmi šmat prośbaŭ pašyryć bazu i dadać harady. Ciapier sajt prosta visić u internecie. Jak tolki ŭ nas źjavicca čas i mahčymaści, my jaho dapracujem.
Pieršyja paru miesiacaŭ u Maskvie my šukali dyzajniera i veb-prahramista, a praz paŭhoda pieraaryjentavalisia na stvareńnie hłabalnaha lost and found servisu Beat the bushes — na amierykanskim słenhu heta aznačaje «ŭzmocniena šukać». My praanalizavali rynak, i vyśvietliłasia, što ŭ hetaj halinie niama lidara, a ŭsie isnyja servisy adroźnivajucca łajnovym dyzajnam i nizkaj funkcyjanalnaściu.
Naš servis budzie dazvalać šukać ludziej, chatnich žyviolin, rečy i pierš za ŭsio budzie aryjentavany na ZŠA i Jeŭropu.
Dva miesiacy tamu my zapuścili beta-viersiju sajta. Naprykancy listapada my lacim u San-Francyska, kab raźvivać prajekt. Uletku my praviali ŭ ZŠA miesiac, udzielničajučy ŭ roznych kanfierencyjach, abmiarkoŭvajučy naš vopyt i nabyvajučy kantakty. Ź bližejšych płanaŭ — zrabić dadatki na ŭsie mabilnyja devajsy i pryciahnuć aŭdytoryju — u nas vialiki biudžet pad PR. Hałoŭnaja meta — pačać žyć bieź inviestycyj. Upeŭnienaści dadaje toj fakt, što Ihar Macaniuk, były vice-prezident Mail.ru i hałoŭny inviestar, u nas vieryć.
Inšyja historyi čytajcie TUT.