Na Bychaŭski zamak vydzielena 2 miljardy rubloŭ. Patrebna 100 miljardaŭ
Ramont pačniecca da Śviata piśmienstva.
U Bychavie źbirajucca raspačać ramont miascovaha zamka da Śviata piśmienstva, jakoje ŭ 2013 hodzie projdzie ŭ hetym rajcentry.
Heta pomnik architektury 16–17 stahodździaŭ, adzinaje zamkavaje zbudavańnie, što acaleła va ŭschodniaj Biełarusi.Pavodle aficyjnaj infarmacyi, pakul na padrychtoŭku da kanservacyi vydzielena dva miljardy rubloŭ.
«Zadača staić, kab častku restaŭracyi pačać u 2013 hodzie, niejkija elementy adnaŭleńnia pakazać da Dnia piśmienstva.
Dva miljardy dla takoha zamka — niaznačnaja suma. My viadziem pieramovy, i jość razumieńnie i padtrymka z boku ministra kultury pra toje, što budzie razhladacca pytańnie pra dadatkovaje finansavańnie», —cytujuć aficyjnyja krynicy abiacańnie načalnika ŭpraŭleńnia Mahiloŭskaha abłvykankamu Anatola Synkaŭca.
Zajaŭlajecca, što całkam rekanstrukcyju Bychaŭskaha zamka planujecca zaviaršyć da 2018 hodu.
U rajonnym adździele architektury i budaŭnictva ŭ pačatku kastryčnika ŭdałosia daviedacca, što
na rekanstrukcyju pomnika na siońniašni dzień nieabchodna blizu 100 miljardaŭ rubloŭ.
Bychaŭski zamak uźviali jak abarončaje zbudavańnie ŭ pieršaj pałovie siamnaccataha stahodździa. Naležaŭ jon hietmanu Vialikaha Kniastva Litoŭskaha Janu Chadkieviču. Potym im zavałodali Sapiehi.
Ciapier zaniapałaja cytadel uzvyšajecca pa-nad krutym schiłam abarončaha rova. Z akon vidać šyroki dniaproŭski popłaŭ. Akramia samoha zamka, pakrysie razburajucca i zbudavańni vakoł jaho. Napaŭrazburanaj staić zamkavaja vieža.
Doŭhi čas u murach zamka raźmiaščalisia roznyja vytvorčaści. Kali budynak užo pustavaŭ, zdaryŭsia pažar, jaki źniščyŭ častku dachu. Paśla hetaha razbureńnie pomnika pačałosia bolš intensiŭna. Tam, dzie niama dachu, budynak zarastaje maładymi dreŭcami.