Biełaruś, Rasija, Kazachstan chočuć pradavać elektraenierhiju ŭ ES
Isnujučyja enierhamahutnaści krain — udzielnic AEP dazvalajuć realizoŭvać elektraenierhiju ŭ krainy Jeŭrasajuza pry efiektyŭnym vyrašeńni prablem stvareńnia ahulnaha rynku na terytoryi Kazachstana, Biełarusi i Rasii.Pra heta zajaviŭ člen kalehii (ministr) pa enierhietycy i infrastruktury AEK Daniał Achmietaŭ u Brusieli na kanfierencyi Jeŭrelektryk i Elektraenierhietyčnaha savieta SND, paviedamiła
Pavodle słoŭ Achmietava, enierhietyčnyja mahutnaści Rasii, Kazachstana i Biełarusi vykarystoŭvajucca ŭ miežach 60%, i isnuje kałasalny ekspartny patencyjał. «Tamu razumieńnie partnioraŭ ź jeŭrapiejskaha boku, ich pohladaŭ, mientalnaści i ahulnaha mierkavańnia dazvalaje nam chutčej sfarmiravać našy padychody da realizacyi našaha surjoznaha ekspartnaha patencyjału ŭ śfiery elektraenierhietyki», — patłumačyŭ jon.
Achmietaŭ dadaŭ, što na siońnia krainy AEP ažyćciaŭlajuć prodaž elektraenierhii ŭsiaho niekalkim jeŭrapiejskim krainam, uklučajučy Finlandyju, Litvu, Łatviju i Narviehiju.«Ale patencyjał značna vyšejšy. U tym liku my možam vykarystać i ekspartny patencyjał, naprykład Kazachstana. Isnujučyja enierhamahutnaści Kazachstana dazvalajuć siońnia realizoŭvać elektraenierhiju ŭ krainy Jeŭrasajuza pry efiektyŭnym vyrašeńni prablem stvareńnia ahulnaha rynku na prastory troch našych dziaržaŭ — Kazachstana, Biełarusi i Rasii», — paviedamiŭ čynoŭnik.
Jon dadaŭ, što zaraz rychtujecca zbałansavanaja prahrama raźvićcia ahulnaha elektraenierhietyčnaha rynku Rasii, Kazachstana i Biełarusi, jaki maje vysoki patencyjał na asnovie adzinaj technałahičnaj bazy, adzinaj infrastruktury, jakaja isnavała raniej, i adzinych technałahičnych paramietraŭ.«My ŭ chutkim časie pradstavim kiraŭnikam našych dziaržaŭ takuju prahramu. Dumajem, što buduć surjozna transfarmavanyja našy narmatyŭnaja i zakanadaŭčaja bazy. Razam z tym, vyrašeńnie hetaj prablemy dazvolić stvaryć toj precedent farmiravańnia ahulnaha rynku, kali ŭpieršyniu na prastory troch našych dziaržaŭ my budziem mieć mahčymaść stvaryć realny i efiektyŭna pracujučy elektraenierhietyčny rynak, jaki budzie zasnoŭvacca na lepšych suśvietnych prykładach», — paviedamiŭ Achmietaŭ.
Na jaho dumku, u nastupnym ahulny rynak elektraenierhii budzie charaktaryzavacca svabodnym dostupam da pasłuh naturalnych manapolij, harmanizavanym zakanadaŭstvam, adzinaj mietadałohijaj taryfnaj palityki, adzinym infarmacyjnym polem dla ŭdzielnikaŭ rynku, adzinymi techničnymi normami i praviłami, najaŭnaściu uzhodnienych bałansaŭ enierharesursaŭ AEP.
«Farmiravańnie ahulnaha elektraenierhietyčnaha rynku stvoryć taksama i multyplikatyŭny efiekt praz pašyreńnie supracoŭnictva krain u sumiežnych śfierach: budaŭnictvie i ekspłuatacyi infrastruktury elektraenierhietyčnaha kompleksu, enierhietyčnym mašynabudavańni i inavacyjnaj dziejnaści», — zaznačyŭ Achmietaŭ.
Viačasłaŭ Budkievič, BiełaPAN.