Zatrymany padazravanyja ŭ razbojnym napadzie na taksista. Vyśvietliłasia: biednyja studenty

23.11.2012 / 09:31

22 listapada apieratyŭnyja supracoŭniki minskaha kryminalnaha vyšuku zatrymali padazravanych u razbojnym napadzie na taksista, učynienym čatyry dni tamu,

paviedamiŭ pres-sakratar HUUS Minharvykankama Alaksandr Łastoŭski.

Nahadajem, nočču 18 listapada troje nieviadomych sieli da 46-hadovaha kiroŭcu taksi na prypynku pa vulicy Śviardłova i paprasili padvieźci ŭ mikrarajon Sierabranka. Adnak jak tolki aŭtamabil dajechaŭ da Červieńskaha rynku, pasažyry paprasili spynicca, i dvoje ź ich pakinuli sałon, admoviŭšysia płacić. U hety čas, jak paźniej raskazaŭ taksist, treci klijent, što zastaŭsia ŭ sałonie, dastaŭ pnieŭmatyčny pistalet i pad jaho pahrozaj pasprabavaŭ zabrać vyručku.

Kiroŭca akazaŭ supraciŭleńnie, zavałodaŭ pistaletam i zdoleŭ pakinuć sałon aŭtamabila. Adnak i napadniki nie adstavali.

Hety kanflikt pryciahnuŭ uvahu narada Partyzanskaha adździeła departamienta achovy MUS, jaki prajazdžaŭ mima. Vyhlad milicejskaha ekipažu, što nabližaŭsia, napałochaŭ złačyncaŭ, i jany paśpiešliva ŭciakli. Praŭda, zabraŭšy z sałona aŭtamabila 200 tysiač rubloŭ i niekatoryja asabistyja rečy vadziciela.

Pa fakcie napadu va ŭpraŭleńni Śledčaha kamiteta pa Minsku była raspačata sprava za razboj na padstavie č. 2 art. 207 KK.

Pavodle słoŭ Łastoŭskaha, padazravanyja va ŭčynieńni złačynstva byli zatrymany adnačasova ŭ Minsku i Mahilovie. Padčas rasśledavańnia stała viadoma, što napadniki nie ź Minska, dvoje ź ich vučacca ŭ staličnaj navučalnaj ustanovie.

A treci na vychadnyja pryjechaŭ da ich u hości, što jany i vyrašyli adznačyć z užyvańniem śpirtnoha. Pakolki hrošaj raspłacicca z taksistam nie było, vyrašyli napaści na jaho.

Čytajcie taksama:

Kamientary da artykuła