Klip karejskaha repiera pabiŭ rekord na YouTube: jaho prahladzieli bolš za 800 młn čałaviek — videa
Videaklip paŭdniovakarejskaha repiera Psy pabiŭ absalutny rekord pa kolkaści prahladaŭ na partale Youtube. Usiaho za čatyry miesiacy jaho sinhł pad nazvaj Gangnam Style pa stanie na ranicu niadzieli pahladzieli bolš za 812 młn čałaviek.
Papiaredni rekord pa liku prahladaŭ — 803 młn — naležaŭ pieśni Baby kanadca Džaścina Bibiera.
U rolik vyśmiejvajecca spažyviecki styl žyćcia Hanhnama, bahataha pryharada paŭdniovakarejskaj stalicy Sieuła.
Taniec, jaki repier vykonvaje ŭ klipie Gangnam Style, zdabyŭ takuju papularnaść, što jaho paŭtaryli miljony ludziej pa ŭsim śviecie — ad hienieralnaha sakratara AAN Pan Hi Muna da źniavolenych turmy na Filipinach.
Gangnam Style atrymaŭ pryz jak najlepšy videarolik na cyrymonii MTV Europe Music Awards. Videa uznačaliŭ čarty ŭ 28 krainach.
U knihu rekordaŭ Hiniesa klip uvajšoŭ jak pieśnia, jakaja nabrała najbolšuju kolkaść «łajkaŭ», — ciapier ich u rolika na YouTube kala 5,4 młn.
«Heta vialiki chit hłabalnaha ŭzroŭniu, nie padobny ni na što z taho, što my bačyli raniej», — havorycca ŭ błohu YouTube.
U błohu videachostynhu taksama zhadvajecca, što chutkaść, ź jakoj videa nabyvaje papularnaść, biesprecedentnaja dla YouTube.