Śmierč na Haradzienščynie
Na adnym z chutaroŭ Hrodzienskaha rajona sioleta nie budzie bahataha ŭradžaju cukrovak. Žyćcio siamidziesiacihadovaj hrušy spyniŭ urahanny viecier, sapraŭdny śmierč, jaki praimčaŭsia tut u piatnicu viečaram. Niekalki chvilin — i dreva prykładna dvaccacimietrovaj vyšyni z taŭščeznym stvałom było vyrvana ź ziamli i kinuta na susiedniuju adrynu, nie paškadavaŭšy, zrazumieła, dach...
Dziŭna: pobač z hetym chutaram — lesapasadki, sotni dreŭ, ale nie pašancavała, nakolki mnie ŭdałosia ŭbačyć, tolki hetaj hrušy dy jašče adnoj biarozie la čyhunki. Mienavita jany apynulisia na šlachu biazlitasnaj stychii. Ab jaje sile śviedčyć toj fakt, što ŭ Hrodnie byŭ pierakuleny hazietny kijosk, praź jaki pieralacieŭ taksama adarvany ad asfaltu paviljon — pałatka, dzie handlavali pivam.
Pavodle infarmacyi z Hrodzienskaha abłasnoha ŭpraŭleńnia MNS, razburenni ad urahannaha vietru z praliŭnymi daždžami i navalnicami zarehistravany ŭ 12 rajonach vobłasci i ŭ abłasnym centry, paciarpieli 225 nasielenych punktaŭ. Paškodžany 66 damoŭ, 2 abjekty sackultbytu, 170 sielskahaspadarčych budynkaŭ, 18 kiłamietraŭ linij elektrapieradač, 35 hiektaraŭ lesanasadžeńniaŭ i sielhasuhodździaŭ. Na niekatory čas byli abiastočany 155 nasielenych punktaŭ, dziciačy sadok, 186 transfarmatarnych padstancyj. U Hrodnie pavalenymi drevami paškodžana šmat aŭtamabilaŭ.
Pavodle papiarednich padlikaŭ, straty ad urahanu — bolš za 75 miljonaŭ rubloŭ. Najbolš paciarpieli horad Hrodna, Hrodzienski, Dziatłaŭski, Zelvienski i Ščučynski rajony. Ale samaje strašnaje, što nie abyšłosia biez achviaraŭ. U Ščučynskim rajonie dva chłopčyki, 14 i 15 hadoŭ, jechali na viełasipiedach pa darozie Jančuki — Turja. Ad małankavaha razradu adzin z ich zahinuŭ, a druhi trapiŭ na balničny łožak z elektratraŭmaj. Špitalizavana z čerapna?mazhavoj traŭmaj i žycharka vioski Małyja Krahli ŭ Dziatłaŭskim rajonie. Piensijanierka vyjšła na vulicu pahladzieć, što robicca na dvary, i trapiła pad šyfier, jaki padaŭ z dachu.
Z?za padzieńnia napružańnia ŭ elektrasistemie časova spynialisia niekalki vytvorčych cechaŭ na hrodzienskich pradpryjemstvach «Chimvałakno» i «Azot». Elektrazabieśpiačeńnie chutka adnavili i na praciahu źmieny byŭ naładžany zvyčajny rabočy režym.
Zhodna z infarmacyjaj hałoŭnaha śpiecyjalista centra prapahandy i navučańnia pry Hrodzienskim abłasnym upraŭlenni MNS Raisy Maśko, na praciahu dvuch sutak asnoŭnaja kolkaść vyjezdaŭ vyratavalnikaŭ pryjšłasia na akazańnie dapamohi nasielnictvu i arhanizacyjam pry razbory zavałaŭ, raspiłoŭcy dreŭ, jakija ŭpali na ziamlu albo zavisli nad pabudovami. Razbirali pryviedzienyja ŭ avaryjny stan dachi, adpampoŭvali vadu z padvałaŭ žyłych damoŭ... A ŭ vioscy Dubinka Hrodzienskaha rajona rabotniki MNS vyratoŭvali troch koniej, jakija apynulisia siarod pavalenych dreŭ.
Ciapier u Hrodnie i rajonach vobłasci pracujuć kamisii pa acency strat i robicca ŭsio, što nieabchodna dla likvidacyi nastupstvaŭ stychii.