Sud apraŭdaŭ Ŭładzimiera Šulžyckaha
18‑hadovy Uładzimier na nievialikich arkušach papiery pisaŭ abviestki ź pieralikam chvalaŭ Radyjo Svaboda i zakidvaŭ ich u paštovyja skrynki.
Sudździa smarhonskaha sudu Alaksandar Kviatkievič apraŭdaŭ Uładzimiera Šulžyckaha z‑za «adsutnaści składu złačynstva». 18‑hadovy Uładzimier Šulžycki z asabistaj inicyjatyvy na nievialikich arkušach papiery pisaŭ abviestki ź pieralikam chvalaŭ Radyjo Svaboda i zakidvaŭ ich u paštovyja skrynki. Na arkušach jon dapisvaŭ svoj mabilny telefon na vypadak, kali niekamu nia ŭdasca naładzić pryjmač.
Adnojčy niechta zatelefanavaŭ jamu i paprasiŭ dapamohi i pakinuŭ adras. Kali Ŭładzimir pajšoŭ na toj adras, amal pad samymi dźviaryma jaho čakali ŭčastkovy i jašče niekalki milicyjantaŭ. Tady jany skazali, što šukajuć złačyncu i zapatrabavali, kab Šulžycki pajšoŭ ź imi ŭ pastarunak. Tam na jaho skłali pratakoł, ale nie za raspaŭsiud abviestak z chvalami, a nibyta za toje, što Ŭładzimier niecenzurna łajaŭsia.
Siońnia ŭ sudzie vyśvietliłasia, što telefonny zvanok da Šulžyckaha byŭ zrobleny z Smarhonskaha pastarunku, a milicyjanty, jakija jaho zatrymvali, pačali błytacca ŭ pakazańniach i ničoha jasnaha nie mahli paviedamić. Tamu sudździa j pryniaŭ apraŭdaŭčaje rašeńnie.
Adrazu paśla vyniasieńnia prysudu Ŭładzimier Šulžycki adkazaŭ na našyja pytańni:
‑ Ci źbirajeciesia Vy praciahvać svaju infarmacyjnuju dziejnaść i razdavać abviestki z chvalami «Radyjo Svaboda»?
‑ Kaniešnie, hetaja sprava budzie praciahnuta. Budu razdavać kalandaryki. Kalandaryki — heta, kaniešnie, dobra, ale na ich, na žal, niama majho numaru telefona. Nu ale kalandaryki niekali skončacca, dyk tady budziem razdavać listki, jakija razdavali raniej.
— Ci šmat ludziej u vašych miaścinach słuchaje «Radyjo Svaboda»?
— Nu, napeŭna, nia vielmi šmat. Ale sa mnoj niadaŭna była takaja historyja. Niejak ja jechaŭ, i nočču na ciomnaj darozie ŭ mianie sapsavaŭsia rover. Ja zajechaŭ da ludziej, kab jany mnie dali instrument i dapamahli krychu. Jany dali instrument, ja ŭsio zrabiŭ i ŭ padziaku daŭ im kalandaryki «Radyjo Svaboda». A jany pytajucca — heta nie pra ciabie kazali, što ty 40 kilametraŭ na rovery prajechaŭ na Čarnobylski šlach? Tak što ludzi ŭ nas jašče słuchajuć, i, miarkuju, jašče nia ŭsio skončana...